CM રૂપાણીને સુરતના જાગૃત નાગરિકે આપી નોટીસ: જવાબ આપો તમે ગુજરાતીઓને શા માટે છેતર્યા?

વિશ્વભરમાં ફેલાયેલી કોરોના મહામારીથી આપણો દેશ અને રાજ્ય પણ બાકાત રહ્યા નથી. આ મહામારીને નાથવા કેન્દ્ર અને રાજ્ય સરકાર દ્વારા જાહેર કરાયેલ લોકડાઉનને પગલે ધંધા વ્યવસાય બંધ થઈ જતા લોકો મુશ્કેલીમાં મુકાઈ ગયા છે. ખાસ કરીને રોજેરોજનું રળી ખાનાર શ્રમિક વર્ગને ભૂખે મરવાનો વારો આવ્યો છે. જો કે સરકાર અને સંખ્યાબંધ સ્વૈચ્છિક સંસ્થાઓ તેમજ દાતાઓ અવિરત સેવાકાર્યો કરીને લોકોને રાહત આપવાનો પ્રયાસ કરી રજ્ઞા છે.

સરકાર દ્વારા પણ વિવિધ યોજનાઓ જાહેર કરીને અમલમાં મુકાઈ રહી છે. તાજેતરમાં ગુજરાત સરકારે આવી જ એક યોજના ‘આત્મનિર્ભર ગુજરાત સહાય યોજના જાહેર કરી જે અંતર્ગત લોકોને બેંક દ્વારા ૧ લાખ રૂપિયાની સરળ લોન મળી રહેશે. જો કે સરકારની આ યોજનાને છેતરપિંડી ગણાવીને તેને હાઈકોર્ટમાં પડકારવાની તૈયારી થઈ રહી છે.

સુરત શહેરના વેપારી અને સામાજિક કાર્યકર સંજય ઈજાવાએ તેમના વકીલ દ્વારા મુખ્યમંત્રી રૂપાણી અને આરોગ્ય મંત્રી કાનાણીને આ યોજનાની જાહેરાત અન્વયે કાયદેસર નોટિસ આપી છે. આ નોટિસમાં જણાવ્યા અનુસાર મુખ્યમંત્રી અને આરોગ્ય મંત્રીએ આત્મનિર્ભર ગુજરાત સહાય યોજના જાહેર કરીને સોશિયલ મીડિયામાં એવી જાહેરાત કરી હતી કે ‘લોન લેવા કોઈ ગેરંટર નહીં અને સરળ પ્રક્રિયા હશે. માત્ર અરજી કર્યાથી લોન મળશે અરજી ફોર્મ ફી કે અન્ય કોઈ રકમ લેવામાં નહીં આવે’.