ઘરેથી ભાગી ગયેલા પ્રેમી પંખીડાને પરિવારે વીજપોલ સાથે બાંધી લાકડીથી માર્યો ઢોર માર

તાજેતરમાં છોટાઉદેપુર જિલ્લાના રંગપુર રાઠ વિસ્તારમાં ધડાગામમાંથી એક ખુબ જ દર્દનાક કિસ્સો સામે આવ્યો છે. જેમાં પ્રેમી યુગલને તાલિબાની સજા આપતો વીડિયો વાઇરલ થતાં હોબાળો મચી જવા પામ્યો છે. જાણવા મળ્યું છે કે, યુવતીના પરિવારજનો દ્વારા પ્રેમ યુગલને વીજળીના થાંભલે બાંધી માર મારવામાં આવ્યો હતો અને તેનો વીડિયો સોશિયલ મીડિયા પર પણ વાઇરલ થયો હતો. વાઇરલ વીડિયોના આધારે રંગપુર પોલીસ દ્વારા કાર્યવાહી હાથ ધરવામાં આવી છે.

મળતી માહિતી મુજબ, સોશિયલ મીડિયામાં વાઇરલ થયેલો વીડિયો છોટાઉદેપુર જિલ્લાના રંગપુર પોલીસ સ્ટેશનની હદમાં આવતા ધડાગામનો હોવાનું સામે આવ્યું હતું. જેમાં એક જ ગામમાં આડોશ-પાડોશમાં રહેતા યુવક અને યુવતી એક બીજાના પ્રેમમાં પડ્યા હતા. બે દિવસ પહેલા જ બંને ઘરેથી જંગલમાં ભાગી ગયા હતા. ત્યારબાદ યુવતીના પરિવારજનોએ તેણે શોધી કાઢ્યા હતા અને પ્રેમી યુગલને વીજળીના થાંભલે બાંધીને તાલિબાની સજા ફટકારવામાં આવી હતી.

જાણવા મળ્યું છે કે, યુવતીના કાકાએ યુવાનને વીજપોલ સાથે બાંધી દીધો હતો અને લાકડીથી ઘા માર્યા હતા અને યુવતીને પણ બેરહેમીપૂર્વક માર મારવામાં આવતો વીડિઓ વાઇરલ થયો હતો. 15 જૂનના રોજ આ ઘટના બની હોવાથી ઝડપથી વાઇરલ થતાં પોલીસ દ્વારા કાર્યવાહી હાથ ધરવામાં આવી હતી.