મજબુરીને કારણે બાળપણમાં ન ભણી શક્યા, હાલ 105 વર્ષની ઉમરે ભણીને પણ પુરા કરે છે સપના

જો કોઈ વ્યક્તિને કઈક શીખવું હોય તો તેને કોઈ રોકી શકતું નથી, પણ તેમ છતાં કોઈ એવી મજબૂરી પણ અઆવી જાય છે તેના કારણે તેના દરેક સપના અધૂરા રહી જાય છે. અને કહેવાય છે ભણવા માટે કોઈ ઉમર જોતું નથી. અને ભણવાની ધગશને ઉંમર સાથે કોઈ સંબંધ નથી, આ વાતને કેરળની એક અતિ વૃદ્ધ મહિલાએ સાબિત કરી બતાવી છે. 105 વર્ષની મહિલા ભાગીરથી અમ્માએ હાલમાં જ ચોથા ધોરણની પરીક્ષા આપી ચોંકાવનારુ કાર્ય કરી બતાવ્યું છે.

105 વર્ષની મોટી ઉમરે પ્રાથમિક શાળાની પરીક્ષા આપનારી આ કદાચ વિશ્વની પહેલી મહિલા બની હશે. માત્ર આઠ વર્ષની ઉમરે માતાપિતા ગુમાવતાં નાનાં ભાઇ-બહેનોની જવાબદારી માથે આવી પડી હતી.

આટલું દુઃખ ઓછું હોય તેમ નાની ઉમરે લગ્ન પણ થઇ ગયાં હતાં અને છ બાળકોની માતા પણ બની ગયા હતા. પતિનું અકાળે અવસાન થતાં છ બાળકોને મોટાં કરવાની જવાબદારી ફરી આવી પડી હતી એટલે ભણવાની ઉત્કટ ઇચ્છા હોવા છતાં ભાગીરથી ભણી શક્યાં નહોતાં.