સુરતમાં કોરોના આઈસોલેશન સેન્ટરમાં જીવના જોખમે સેવા કરતા કાર્યકર્તાઓ માટે નિવૃત મહિલા પ્રોફેસરે આપ્યું મોટું દાન

કોરોનાને એક થઈને હરાવવાનું કેમ્પેઈન હાલ જોરશોરથી ચાલી રહ્યું છે, કેટલીય સંસ્થાઓ અને સંગઠનો કોરોનાને હરાવવા મેદાને આવ્યા છે. કહેવાય છે જેને સેવા કરવી જ છે અને જેનામાં સેવાનો ભાવ છે તેમની તમે તેટલી વાતો કરીએ એટલી ઓછી છે. કોરોના આઈસોલેશન સેન્ટરમાં જીવના જોખમે સેવાભાવી કાર્યકર્તાઓ દર્દીઓની સેવા કરી રહયા છે. આવા આઈસોલેશન સેન્ટરમાં સેવા આપતા પેરા મેડીકલ સ્ટાફને પગાર આપી સુરતના એક નિવૃત મહિલા પ્રોફેસરે એક નાગરીક કર્તવ્યનું શ્રેષ્ઠ ઉદાહરણ પુરૂ પાડયુ છે.

ઓલપાડ કોલેજના નિવૃત પ્રોફેસર કોકિલાબેન મજીઠીયાએ તેના પેન્શન અને નિવૃત મુડીમાંથી આજે કોરોના આઈસોલેશનમાં આરોગ્ય સેવા આપતી બહેનોને તેના પગારના ચેકો અર્પણ કર્યા હતા, નાના વરાછા કોમ્યુનિટી હોલ ખાતે સંસ્કૃતિ યુવા ચેરીટેબલ ટ્રસ્ટ સંસ્થા વતિ આઈસોલેશન સેન્ટર્સમાં સેવા આપતી કુ.દિપાલી રાજેશભાઈ કિકાણી તથા ભુમિકા દેવરાજભાઈ મીરોલીયાને પગારના ચેક કોકીલાબેન તરફથી અર્પણ કરાયા હતા. ઉપરાંત ઉત્રાણ ગામ ખાતે કોમ્યુનિટી હોલમાં લાઈફ લાઈન ચેરીટેબલ ટ્રસ્ટ સંચાલીત કોરોના આઈસોલેશન સેન્ટરમાં કામ કરતા કલ્પાબેન જી. પરમાર અને અરવિંદભાઈ એમ.ચાવડાને તેની સેવા મુલ્ય પેટે ચેક અર્પણ કર્યા હતા.