સુરતમાં ચુંટણીની રાત્રે જ ખેલાયો ગંભીર ખૂની ખેલ, ઘટનાને અંજામ આપનાર ગાડીમાંથી નીકળ્યો કેસરી ખેસ

ગુજરાતમાં અવાર-નવાર નહીવત બાબતમાં ખૂની ખેલ ખેલાયો હોવાની ઘટનાઓ સામે આવતી રહે છે. ત્યારે આજ રોજ આવી જ એક ઘટના સુરતમાંથી સામે આવી છે. સોશિયલ મીડિયા પર ફોટા અપલોડ કરવા બદલ મોડી રાત્રે 15 યુવકોએ બે યુવકો ઉપર તીક્ષ્ણ હથિયારથી હુમલો કર્યો હતો. જેમાંથી એકનું ઘટના સ્થળે જ મોત નીપજ્યું હતું, જ્યારે અન્યની હાલત ગંભીર છે. હુમલાખોરોમાં રાંદેર પોલીસ સ્ટેશનના હેડ કોન્સ્ટેબલનો પુત્ર પણ શામેલ છે. પોલીસે કોન્સ્ટેબલના પુત્ર ચિંતન સહિત 3 આરોપીઓની ધરપકડ કરી છે.

કોન્સ્ટેબલના પુત્ર ચિંતને કાર સાથે ફોટો લીધો અને તેને સોશિયલ મીડિયા પર અપલોડ કર્યો. જીગ્નેશ ચૌહાણે ફોટો પર ટિપ્પણી કરી હતી કે, બીજી કાર પોતાની છે તેવું કહીને તું લીડર નહિ બને. અપશબ્દ લખ્યા બાદ બંને જણા વચ્ચે ફોન પર લડાઈ થઇ હતી. આ પછી ચિંતને જીગ્નેશને જહાંગીરપુરામાં બોલાવ્યો. આ દરમિયાન ચિંતને તેના 15 જેટલા સાથીદારો સાથે મળીને સુનિલ અને તેના મિત્ર પર જીવલેણ હુમલો કર્યો હતો. મૃતક સુનીલની પાછળ અને છાતીમાં 8 છરીના ઘા હતા. તે જ સમયે, સુનીલના મિત્ર જીગ્નેશને 10 ઘા વાગ્યા છે.

આરોપી ચિંતનનો ફોન કોલ સાંભળ્યા પછી જીગ્નેશે તેના મિત્ર સુનીલને મદદ માટે બોલાવ્યો અને કહ્યું કે, ચિંતન સાથે તેની લડાઈ થઇ ગઈ છે. જહાંગીરપુરા જલ્દી આવી જા. કોલ આવતાની સાથે સુનીલ કાર લઈને પહોંચી ગયો.

તે દરમિયાન સુનીલ અને જીગ્નેશ કારમાંથી ઉતરીને ઉગત રોડ નજીક વાટાઘાટો કરી રહ્યા હતા, ત્યારે 15-20 યુવકોએ તીક્ષ્ણ હથિયારો સાથે તોડફોડ કરી હતી. હુમલાખોરોએ સુનિલ અને જીગ્નેશ પર છરી, તલવાર વડે હુમલો કર્યો હતો. ગંભીર રીતે ઘવાયેલા સુનિલનું ઘટના સ્થળે જ મોત નીપજ્યું હતું, જ્યારે જીગ્નેશની હાલત નાજુક છે. પોલીસે ફરિયાદ નોંધીને વધુ તપાસ હાથ ધરી છે.