સુરતમાં ખાનગી હૉસ્પિટલની નર્સે તાપીમાં લગાવી મોતની છલાંગ, કારણ હતું ચોકાવનારું 

સુરત(ગુજરાત): આજકાલ વધી રહેલી આત્મહત્યાની ઘટના દરમિયાન સુરતની મધ્યમાંથી પસાર થતી તાપી નદી જાણે સુરતના લોકો માટે આપઘાતનું સરસનામું બનતી જાય તેવું લાગી રહ્યું છે. છેલ્લા ત્રણ દિવસમાં સુરતમાં ત્રીજી આપઘાતની ઘટના સામે આવી છે. જેમાં આજે ખાનગી હોસ્પિટલમાં નર્સ તરીકે કામ કરતી યુવતીએ પારિવારિક ઝઘડાને લઇને તાપી નદીના પૂલ ઉપરથી તાપી નદીમાં જ કૂદકો મારી આપઘાત કરી લેતા હોબાળો મચી જવા પામ્યો છે.

સુરતની જીવાદોરી તાપી નદી સુરત મધ્યમાંથી પસાર થાય છે અને આ નદી ઉપર સુરતમાં ઠેકઠેકાણે પૂલ આવેલા છે. જોકે, સુરતના લોકો માટે તાપી નદી જાણે કે આપઘાત માટેનું સરળ સાધન બની ગયું હોય તેવી ઘટનાઓ સતત સામે આવી રહી છે. કારણ કે, ત્રણ દિવસ પહેલાં કેબલ બ્રિજ પરથી એક યુવાને આપઘાત માટે કૂદકો માર્યો હતો. ગઈકાલે સરદારબ્રિજ પરથી એક યુવાને આપઘાત માટે તાપી નદીમાં ઝંપલાવ્યું હતું.

આ દરમિયાન આજે વધુ એક યુવતીએ સુરતના ચોક બજાર ખાતે આવેલા મકાઈ પુલ પરથી તાપી નદીમાં મોતની છલાંગ લગાવી હતી. જોકે, સુરત સ્ટેશન વિસ્તારમાં આવેલી વિનસ હોસ્પિટલમાં નર્સ તરીકે ફરજ બજાવતી પુષ્પાબેન બીપીનભાઈ વાગે પરિવારમાં કોઈ બાબતે ઝઘડો થયો હોવાનું સામે અવાયું છે. આ વાતમાં લાગી આવતા આજે બપોરે એક વાગ્યાના સુમારે મકાઈ પુલ ઉપર પહોંચી હતી અને ત્યાંથી લોકો જ્યારે પસાર થઈ રહ્યા હતા ત્યારે તેમની સામે જ તે મહિલાએ તાપી નદીમાં છલાંગ લગાવી લીધી હતી.