શ્રીલંકા બાદ હવે વધુ એક પાડોશી દેશની આર્થિક સ્થિતિ કથળી- આ વસ્તુઓની આયાત પર પ્રતિબંધ

નેપાળ(Nepal)ની સેન્ટ્રલ બેંકે એક મોટી જાહેરાત કરી છે. સેન્ટ્રલ બેંકે વાહનો અને કોઈપણ મોંઘી અથવા લક્ઝરી વસ્તુઓની આયાત પર પ્રતિબંધ મૂક્યો છે. વાસ્તવમાં નેપાળમાં રોકડની અછતની સાથે વિદેશી મુદ્રા ભંડારમાં પણ ઘટાડો થઈ રહ્યો છે. જેના કારણે બેંકે આ મોટો નિર્ણય લેવો પડ્યો છે. નેપાળની કેન્દ્રીય બેંક ‘નેપાલ રાષ્ટ્ર બેંક(Nepal Rashtra Bank)’ એ ગયા અઠવાડિયે અધિકારીઓ સાથેની ઉચ્ચ સ્તરીય બેઠક બાદ આ સૂચનાઓ જારી કરી હતી.

આ જાહેરાત પછી, NRBના પ્રવક્તા ગુણાખર ભટ્ટે કહ્યું, “અમે અર્થવ્યવસ્થામાં કોઈપણ પ્રકારની કટોકટીનાં સંકેતો જોઈ રહ્યા છીએ જેનું મુખ્ય કારણ આયાતમાં વધારો છે.” એટલા માટે અમે તે વસ્તુઓની આયાત બંધ કરવાનું વિચારી રહ્યા છીએ જેની તાત્કાલિક જરૂર નથી.

વિદેશી મુદ્રા ભંડારમાં ઘટાડો:
નોંધનીય છે કે પાડોશી દેશ શ્રીલંકાની જેમ નેપાળની આર્થિક સ્થિતિ પણ કથળી રહી છે. આયાતમાં વધારો, પ્રવાસન અને નિકાસમાંથી આવકનો અભાવ અને ચૂકવણીના પ્રવાહમાં ઘટાડો થવાને કારણે જુલાઈ 2021 થી નેપાળમાં વિદેશી હૂંડિયામણ ભંડાર ઘટી રહ્યો છે. સેન્ટ્રલ બેંક દ્વારા જારી કરાયેલા ડેટા અનુસાર, દેશનો કુલ વિદેશી મુદ્રા ભંડાર ફેબ્રુઆરી 2022 સુધીમાં 17 ટકા ઘટીને $9.75 બિલિયન થયો છે, જે જુલાઈ 2021ના મધ્ય સુધીમાં $11.75 બિલિયન હતો. જો કે નેપાળના નાણામંત્રી જનાર્દન શર્માએ આશ્વાસન આપ્યું હતું કે દેશ શ્રીલંકાના રસ્તે નથી જઈ રહ્યો.

આયાત પર પ્રતિબંધ:
નેપાળ સરકારે સાયકલ, ડિઝાઇન વાહનો, મોપેડ અને આવશ્યક મોટર સાધનો, ચોખા, કાપડ ઉત્પાદનો, મશીનરી અને સ્પેરપાર્ટ્સ, સોનું, ડાંગર, ઇલેક્ટ્રિકલ સાધનો, તૈયાર કપડાં, ચાંદી અને દોરાની આયાત પર પ્રતિબંધ મૂક્યો છે.