અલ્પેશ કથીરિયાએ હાર બાદ ‘મતદારોનો માન્યો આભાર’- ખાતરી આપતા કહ્યું, વરાછાવાસીઓનું આ કામ 5 વર્ષમાં કરીને જ રહીશ

સુરત(Surat): ગુજરાત વિધાનસભાની ચૂંટણી(Gujarat Election 2022)માં ભાજપે 156 સીટ મેળવીને પ્રચંડ વિજય મેળવ્યો છે, ત્યારે સુરતની વરાછા બેઠક પર એવી ચર્ચા ચાલતી હતી કે, ત્યાં આમ આદમી પાર્ટી જીતી જશે, પરંતુ પરિણામ કઈક અલગ જ જોવા મળ્યું છે. વરાછા બેઠક પર આમ આદમી પાર્ટીના ઉમેદવાર અલ્પેશ કથીરિયા(Alpesh Kathiriya)ની હાર થઇ છે અને કુમાર કાનાણી(Kumar kanani)ની જીત થઇ છે.

અલ્પેશની હાર બાદ પણ આભાર યાત્રા:
કાકા સામે ભત્રીજાની હાર થવા છતાં પણ અલ્પેશ કથીરિયાએ આભાર યાત્રા યોજી હતી અને તમામ મતદારોનો આભાર વ્યક્ત કર્યો હતો. આ આભાર યાત્રા દરમિયાન અલ્પેશ કથીરિયાએ કહ્યું હતું કે, આપ સૌને આ તક્ષશિલાની સરથાણાની આ સુરતની કર્ણ ભૂમિ પરથી આપ સૌને ખાતરી આપું છું કે, પાંચ વર્ષની અંદર કાઈ ન થાય તો કઈ નહી પણ, આ પાંચ વર્ષની અંદર વરાછા રોડ ઉપર સરકારી કોલેજ બનશે બનશે ને બનશે જ. તેવી ખાતરી લોકોને આપી હતી.

તેમજ વધુમાં તેમણે કહ્યું હતું કે, વરાછા રોડ પર 25 લાખની વસ્તીની અંદર એક સરકારી કોલેજ નથી, તમને ખાતરી આપીએ છીએ કે, ભલે આપ સૌના આશીર્વાદથી આજે હું ધારાસભ્ય ન બન્યો, પરંતુ ધારાસભ્ય હતો રહીશ અને આવનારા દિવસોમાં તમારી વચ્ચે આવીશ. જયારે પણ કોઈ અન્યાય થતો હશે, સમાજના કામ હશે, કોઈ પણ પ્રકારની તકલીફ હશે, તો પહેલાની જેમ જ અમારી ટીમ રાત દિવસ ઉભા હશું.