કોરોનાની બગડતી સ્થિતિ વચ્ચે અમિત શાહે લોકડાઉનને લઇ કરી દીધો મોટો ઇશારો- દેશમાં લોકડાઉન થશે કે નહીં

દેશમાં કોરોના વાયરસને કારણે પરિસ્થિતિ વધુ વણસી રહી છે, ઘણા રાજ્યોએ આ કારણસર મિની લોકડાઉન અથવા નાઇટ કર્ફ્યુ જેવા પ્રતિબંધો લાદ્યા છે. પરંતુ જેમ જેમ સ્થિતિઓ બગડતી જઈ રહી છે તેમ તેમ ફરી એક વાર રાષ્ટ્રીય લોકડાઉન થવાનું જોખમ ઉભું થવા લાગ્યું છે. કેન્દ્રીય ગૃહ પ્રધાન અમિત શાહે આ ચર્ચા અંગે જણાવ્યું છે કે, કેન્દ્ર સરકારે હવે રાજ્યોના હાથમાં છૂટ આપી છે કે તેઓ નિયંત્રણો અંગેના નિર્ણય લે, રાજ્ય સરકારો પોતાના નિર્ણયો લઈ રહી છે.

એક મુલાકાતમાં અમિત શાહે કહ્યું કે, ‘છેલ્લા 3 મહિનાથી અમે રાજ્યો પર પ્રતિબંધો લગાવવાની સત્તા આપી છે, કારણ કે દરેક રાજ્યની પરિસ્થિતિ એક જેવી હોતી નથી. આવી સ્થિતિમાં રાજ્ય સરકારોએ તેમના સંજોગો પ્રમાણે નિર્ણય લેવો પડશે.’

અમિત શાહે જણાવ્યું હતું કે, જ્યારે લોકડાઉન થયું ત્યારે દેશમાં આરોગ્યનું માળખું ખૂબ જ નબળું હતું, પલંગ-પરીક્ષણ-ઓક્સિજન સહિતની ઘણી સુવિધાઓ પહેલાં નહોતી. જો કે હવે કેન્દ્ર અને રાજ્યોની મદદથી ઘણી તૈયારીઓ કરવામાં આવી છે. અમિત શાહે કહ્યું કે, કોરોના સામે લડવા માટે, દરેક રાજ્યોએ અહીંની પરિસ્થિતિ અનુસાર પોતાના નિર્ણય લેવા પડશે અને કેન્દ્ર સરકાર તેમની સંપૂર્ણ મદદ કરશે.

અમિત શાહે કોરોના સમયગાળા દરમિયાન કુંભ પર શું કહ્યું?
કેન્દ્રીય ગૃહ પ્રધાન અમિત શાહે કહ્યું કે, કુંભ માટે વડા પ્રધાન નરેન્દ્ર મોદીએ ખુદ સંતો સાથે વાત કરી હતી અને કુંભનું પ્રતિક હોવાનું કહ્યું હતું. 13 માંથી 12 અખાડાએ તેમના વતી કુંભ સમાપ્ત કરવાની જાહેરાત કરી છે, હવે લોકોની સંખ્યા પણ ઓછી થઈ રહી છે.