May 15, 2024
સુરતમાં બનેલી ગ્રીષ્મા હત્યાકાંડની ચોંકાવનારી ઘટના રાજ્યભરમાં ચર્ચા વિષય બની છે. કામરેજના પાસોદરા પાટિયા નજીક એકતરફી પ્રેમમાં પાગલ માથાભારે યુવકે યુવતીને જાહેરમાં ગળું કાપીને હત્યા કરી નાખી હતી. તેનાથી પણ વિચલિત કરતી વાત તો એ છે કે, સેંકડો લોકો ઘટના સ્થળે ઉભા હતા અને તમાશો જોઇ રહ્યા હતા, ફોનમાં વિડીયો કેપ્ચર કરી રહ્યા હતા. પરતુ યુવતીને બચાવવા માટે કોઈ માઈનો લાલ આગળ આવ્યું નહિ. છેલ્લા કેટલાક દિવસથી યુવક યુવતીનો પીછો કરી રહ્યો હતો. થોડા દિવસ પહેલા જ યુવતીના મોટાબાપા દ્વારા યુવકને ઠપકો પણ આપવામાં આવ્યો હતો. જોકે, યુવક લાજવાને બદલે ગાજ્યો હતો અને યુવતીના ઘર બહાર પહોંચી જઇને હોબાળો કર્યો હતો.
7-7 વાર યુવતીના પિતા અને આરોપી વચ્ચે થયું હતું સમાધાન
સુરતમાં જાહેરમાં બનેલી ગ્રીષ્માની હત્યા કેસમાં હર્ષ સંઘવીએ ખુદ મૃતકના પરિવાર સાથે મુલાકાત કરી હતી. વાતચીત દરમ્યાન પરિવારના સભ્યો પાસેથી જાણવા મળ્યું કે, આવું પહેલી વાર નથી બન્યું આ પહેલા પણ 7-7 વાર યુવતીના પરિવાર સાથે હત્યારા યુવકને સમજાવવામાં આવ્યો હતો. પરંતુ તે સમયે બદનામીના ડરથી પરિવારે ફરિયાદ કરવાનું ટાળ્યું હતું. સુરતમાં જાહેરમાં યુવતીની હત્યા મામલે ગૃહરાજ્યમંત્રી એક્શનમાં આવી ગયા છે.
પરિવારના સભ્યોએ જણાવ્યું છે કે, હત્યારાને જાહેરમાં ફાંસીએ લટકાવીને સજા આપો. યુવતીના પરિવારે આરોપીને વારંવાર સમજાવ્યો હતો. આરોપી અને યુવતીના પિતા વચ્ચે સમાધાન થયું હતું. પરંતુ બદનામીના ડરથી પરિવારને પોતાની દીકરી ખોવાનો વારો આવ્યો છે. અતિસંવેદનશીલ બનેલી સુરતની આ ઘટનામાં ગૃહ રાજ્યમંત્રી હર્ષ સંઘવી પરિવારની મુલાકાત લીધી હતી, જ્યાં તેમણે પરિવારને સહાનુભૂતિ આપી હતી અને તેમની દીકરીને ઝડપથી ન્યાય મળે તેના માટે હૈયાધારણા આપી છે.
રવિવારે સાંજના સુમારે રાજ્યના ગૃહમંત્રી હર્ષ સંઘવી મૃતક ગ્રીષ્માના ઘરે ગયા હતા. જ્યાં હર્ષ સંઘવીએ પરિવારને સાંત્વના આપતા જણાવ્યું હતું કે, પરિવારને ન્યાય મળશે તે દિવસે ફરી પરિવારને મળશે. આ ઘટનાની તપાસ માટે અલગ-અલગ ટીમો પણ બનાવવામાં આવી છે. FSLનો રિપોર્ટ 24 કલાકમાં મળી જાય તેવી વ્યવસ્થા કરવામાં આવી છે. આ ચોંકાવનારી ઘટનાના ફુટેજ, મોબાઈલની ડિટેઇલ વગેરે મળી ગયા છે. આરોપીને એવી સજા અપાવીશું કે, જેથી બીજું કોઈ આવું કૃત્ય ના કરે. સરકાર સ્પેશિયલ સરકારી વકીલની નિમણુંક કરશે. તેમજ ગ્રીષ્માના પરિવારનો કેસ લડવા સરકારી ખર્ચે વકીલ કેસ લડશે.
Trending News
આરોપી ફેનિલ ગોયાણીના પિતાએ આ ઘૃણાસ્પદ ઘટના જણાવતા કહ્યું હતું કે, ફેનિલ મારો દિકરો છે, પરંતુ આજે કહું છું કે, અમારો ખોટો સિક્કો છે. તે અમારા કહ્યામાં નથી. તેના વિશે ગ્રીષ્માના પરિવારે ફરિયાદ પણ કરી હતી. ત્યારે મેં ફેનિલને ઠપકો આપ્યો હતો. ફેનિલે તે વખતે મને જણાવ્યું કે, હવેથી હું ગ્રીષ્માને હેરાન નહીં કરું, પરંતુ ત્યાર બાદ પણ તે સુધર્યો ન હતો. તેણે જે કર્યું તે શરમજનક બાબત છે. કાયદો તેને ફાંસીની સજા પણ આપશે તો અમને મંજૂર છે.
ઘટના અંગે હર્ષ સંઘવીનું નિવેદન
હર્ષ સંઘવીએ યુવતીના પરિવારજનો સાથે વાતચીત કર્યા બાદ રેન્જ IG રાજકુમાર પાંડિયન પણ હર્ષ સંઘવી સાથે જોડાયા હતા. અને દીકરીને ઝડપથી ન્યાય અપાવવાની ખાતરી આપી છે. ભોગ બનાનર પરિવાર સાથે મુલાકાત બાદ સંઘવીએ આપેલા નિવેદનમાં જણાવ્યું હતું કે, FSLનો રિપોર્ટ 24 કલાકમાં આપવા કહ્યું છે. તમામ પુરાવાના ગણતરીના કલાકમાં ભેગા કરાયા છે. રેન્જ IGની અધ્યક્ષતામાં તપાસ ચાલી રહી છે. ગણતરીના દિવસોમાં ચાર્જશીટ માટે આદેશ અપાયો છે. દીકરીને ઝડપથી ન્યાય મળે તે રીતે કામગીરીનો આદેશ અપાયો છે. દાખલારૂપ ઘટના બને તે રીતે કામગીરી કરાશે. પોલીસ અને સરકાર સંકલન કરી કોર્ટમાં કેસ લડશે. પરિવાર જે પણ વકીલ કહેશે તેનો ખર્ચ સરકાર ઉઠાવશે. પોલીસને રાત-દિવસ એક કરીને કામ કરવા કહેવાયું છે. પોલીસને મજબૂતાઈથી ચાર્જશીટ કરવાનો આદેશ અપાયો છે. આરોપીને કડક સજા મળે તે રીતે પોલીસ મહેનત કરશે.
નોંધનીય છે કે, સુરતના પાસોદરામાં ફેનિલ પંકજ ગોયાણી નામના યુવકે યુવતીની માતા અને ભાઈની નજર સામે જ જાહેરમાં યુવતીની હત્યા કરી હતી. એક વર્ષથી યુવતીને હેરાન કરતા યુવકને પરિવારે સમજાવ્યો હોવા છતાં તે ફરી ઘરે આવી ગયો હતો. જો કે, તેને ફરી સમજાવવા જતાં યુવતીના મોટા પપ્પા-ભાઈને તેણે ચપ્પુના ઘા માર્યા હતા અને હાથમાં જકડી લીધેલી યુવતીનું ગળું કાપી નાખ્યું હતું.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.
