રાહુલ ગાંધીએ મોદી સરકાર પર આકરા પ્રહાર કરતા કહ્યું- ‘ પ્રધાનમંત્રીએ જનતાના ખિસ્સામાંથી ખેરવ્યા 23 લાખ કરોડ- ક્યા ગઈ આ રકમ?’

કોંગ્રેસ નેતા રાહુલ ગાંધીએ ફરી એક વખત મોદી સરકાર પર આકરા પ્રહાર કર્યા છે. તેમણે કહ્યું કે, તેલની વધતી જતી કિંમતોને કારણે સામાન્ય લોકોને સીધી અસર થઈ છે. જે જનતાના ખિસ્સાને અસર કરે છે. પરિવહનમાં વધારાની સાથે ફુગાવો વધી રહ્યો છે. કોંગ્રેસના સાંસદ રાહુલ ગાંધીએ પાર્ટી હેડક્વાર્ટરમાં કહ્યું કે, આજે હું દેશની જનતા સાથે મોંઘવારી, પેટ્રોલ, ડીઝલ અને ગેસ અંગે વાત કરવા માંગુ છું.

ક્યાં ગયા 23 લાખ કરોડ?
કેન્દ્રને સવાલ કરતા રાહુલ ગાંધીએ પૂછ્યું કે, NDA સરકારે ગેસ, ડીઝલ અને પેટ્રોલ એટલે કે GDPથી 23 લાખ કરોડ રૂપિયા કમાયા છે. તે પૈસા ક્યાં ગયા? તમારા ખિસ્સામાં પૈસા જતા નથી. તેમણે કહ્યું કે, છેલ્લા 7 વર્ષથી અમે એક નવો આર્થિક દાખલો જોયો છે. ડિમોનેટાઇઝેશન અને મુદ્રીકરણ બંને એક સાથે થઇ રહ્યા છે.

નરેન્દ્ર મોદીના ચાર-પાંચ મિત્રોનું મુદ્રીકરણ કરવામાં આવી રહ્યું છે. મોદીજીએ અગાઉ કહ્યું હતું કે, હું નોટબંધી કરી રહ્યો છું અને નાણામંત્રી કહેતા રહે છે કે, હું મુદ્રીકરણ કરી રહ્યો છું. ખેડૂતો, મજૂરો, નાના દુકાનદારો, પગારદાર વર્ગ, સરકારી કર્મચારીઓ અને પ્રામાણિક ઉદ્યોગપતિઓનું ડિમોનેટાઇઝેશન થઇ રહ્યું છે.

ગેસ સીલીન્ડરમાં થયો 116% નો ધરખમ વધારો:
કોંગ્રેસના નેતા રાહુલ ગાંધીએ મોંઘવારી મુદ્દે કહ્યું કે, વર્ષ 2014 માં નરેન્દ્ર મોદીએ કહ્યું હતું કે પેટ્રોલ અને ડીઝલના ભાવ વધી રહ્યા છે. વર્ષ 2014 માં જ્યારે UPA એ ઓફિસ છોડી ત્યારે સિલિન્ડરની કિંમત 410 રૂપિયા હતી અને આજે સિલિન્ડરની કિંમત 885 રૂપિયા થઈ ગઈ છે.