ત્રણ-ત્રણ સરકારી નોકરીઓને અધવચ્ચે જ છોડી દીધી- સની દેઓલની ફિલ્મ ‘ઇન્ડિયન’ જોઈને બન્યા IPS ઓફિસર

સફળતાની કહાની(Success story): આજે અમે તમને એક એવા IPS ઓફિસરની કહાની જણાવવા જઈ રહ્યા છીએ જેણે સની દેઓલ(Sunny Deol)ની ફિલ્મ ‘ઈન્ડિયન’ જોયા પછી પોતાનું જીવન બદલી નાખ્યું. જ્યારે કેટલાક લોકો ફિલ્મોમાંથી ખરાબ ટેવો શીખે છે, ત્યારે તેમને ફિલ્મમાં પોલીસ ઓફિસરના સની દેઓલના પાત્રમાંથી પ્રેરણા મળી હતી. આ પછી, તેણે પોલીસ અધિકારીની વર્દી જીતવા માટે દિવસ-રાત મહેનત કરી.

‘ઈન્ડિયન’ ફિલ્મ જોઈને તે વ્યક્તિ IPS ઓફિસર બનવાનો એટલો ઝનૂની બની ગયો કે તેણે ત્રણ સરકારી નોકરીઓ પણ અધવચ્ચે જ છોડી દીધી અને જ્યાં સુધી તે પોતાનું લક્ષ્ય હાંસલ ન કરે ત્યાં સુધી તેણે રાહતનો શ્વાસ ન લીધો. અમે તમને જે IPS ઓફિસરનો જુસ્સો જણાવી રહ્યા છીએ તેનું નામ છે મનોજ રાવત. તે રાજસ્થાનના જયપુરના ગામ શ્યામપુરાનો રહેવાસી છે.

19 વર્ષની ઉંમરે પોલીસની નોકરી મળી:
હાલમાં મનોજ રાવત IPS ઓફિસર તરીકે તૈનાત છે. મનોજ રાવતનો જન્મ સામાન્ય પરિવારમાં થયો હતો. બાળપણથી જ તેને ફિલ્મો જોવાનો ખૂબ શોખ હતો. પોલીસ ઓફિસરની મોટાભાગની ફિલ્મો તેને પોતાની તરફ આકર્ષતી હતી. જો કે, અભ્યાસ બાદ તેણે પોતાનું અને પરિવારનું ભરણપોષણ કરવા કોન્સ્ટેબલની નોકરી સ્વીકારી. 19 વર્ષની ઉંમરે તેઓ રાજસ્થાન પોલીસમાં કોન્સ્ટેબલ તરીકે જોડાયા હતા.

આ પછી પણ મનોજ રાવતે પોતાનો અભ્યાસ બંધ ન કર્યો અને પોલિટિકલ સાયન્સમાં MA કર્યું. જેમતેમ પોતાનો અભ્યાસ પૂરો કર્યો. એ જ રીતે પોલીસ કોન્સ્ટેબલની નોકરી છોડીને કોર્ટમાં ક્લાર્કની નોકરી શરૂ કરી. આ પછી તેણે સિવિલ સર્વિસની તૈયારી માટે ક્લાર્કની નોકરી પણ છોડી દીધી. સિવિલ સર્વિસીસની તૈયારી કરતી વખતે મનોજને CISFમાં નોકરી પણ મળી ગઈ, પરંતુ તેણે આ નોકરી કરવાની પણ ના પાડી દીધી. કારણ કે મનોજ રાવત હવે માત્ર પોતાના લક્ષ્ય તરફ જોઈ રહ્યા હતા.