7 વર્ષની ઉંમરે જ પરિવારના સભ્યોએ કરી નાખ્યા હતા લગ્ન, 12 વર્ષ પછી ‘બાલિકા વધુ’ને મળી આઝાદી

રાજસ્થાન: રાજસ્થાનના ભીલવાડા જિલ્લાની 19 વર્ષીય ‘બાલિકા વધુ’એ માત્ર સાત વર્ષની ઉંમરે લગ્ન કર્યાં હતા અને છેવટે 12 વર્ષ પછી બાળલગ્નની ચુંગાલમાંથી મુક્ત થઇ હતી. બાળ કન્યા માનસીએ ભીલવાડામાં ફેમિલી કોર્ટનો સંપર્ક કર્યો હતો અને તેના બાળ લગ્નને રદ કરવાની અરજી કરી હતી. કૌટુંબિક અદાલતના ન્યાયાધીશ હરિવલ્લભ ખત્રીએ તેમની દુર્દશા સાંભળીને સંવેદનશીલતા દર્શાવી અને માનસીના બાળલગ્ન રદ કરવા માટે ઐતિહાસિક ચુકાદો આપતી વખતે બાળ લગ્ન સામે મજબૂત સંદેશ આપ્યો હતો.

2009 માં મૂળ ભીલવાડા જિલ્લાના પાલડીની રહેવાસી માનસીના લગ્ન સાત વર્ષની ઉંમરે બનારા તહસીલમાં રહેતા એક વરરાજા સાથે થયા હતા. લગભગ 12 વર્ષ સુધી તેને બાળલગ્નનો ભોગ બનવું પડ્યું હતું. આ દરમિયાન ‘ગૌના’ કરવા માટે ‘પંચાયત’ અને અન્ય જાતિઓ તરફથી સતત દબાણ હતું. પરિવારને અનેક વખત ધમકી પણ આપવામાં આવી હતી. આ દરમિયાન માનસીએ બાળ લગ્ન રદ કરવા માટે સારસી ટ્રસ્ટ દ્વારા ડો.કૃતિ ભારતીના અભિયાન વિશે જાણ્યા બાદ  લગ્ન રદ કરવા માટે તેનો સંપર્ક કર્યો હતો. ડો.કૃતિ જોધપુરથી ભીલવાડા આવી હતી અને આ વર્ષે માર્ચમાં ફેમિલી કોર્ટમાં માનસીના બાળ લગ્ન રદ કરવાનો કેસ દાખલ કર્યો હતો. ડો.કૃતિ ભારતી માનસી સાથે ભીલવાડાની ફેમિલી કોર્ટમાં હાજર થયા હતા અને કોર્ટને બાળલગ્ન સંબંધિત હકીકતોથી વાકેફ કરવામાં આવ્યા હતા.

ફેમિલી કોર્ટના જજ હરિવલ્લભ ખત્રીએ 12 વર્ષ પહેલા માત્ર સાત વર્ષની ઉંમરે થયેલા માનસીના લગ્નને રદ કરતો ઐતિહાસિક ચુકાદો આપ્યો હતો. આ આદેશ માનસીને બાળલગ્નના બંધનમાંથી મુક્ત કર્યો હતો. બાળ વિવાહ સામે સમાજને મજબૂત સંદેશ આપતા જજ ખત્રીએ કહ્યું હતું કે, બાળલગ્નનું બંધન નિર્દોષ બાળકોના વર્તમાન અને ભવિષ્ય બંનેને બગાડે છે. માનસીએ કહ્યું હતું કે, ડો. કૃતિ ભારતી દીદીની મદદથી મને બાળવિવાહના વનવાસમાંથી આઝાદી મળી છે. હું બીએ બીજા વર્ષમાં અભ્યાસ કરું છું અને હવે હું આગળનો અભ્યાસ કરવા માંગુ છું અને શિક્ષક બનવા માંગુ છું.

કૃતિ ભારતી-પુનર્વસન મનોવૈજ્ઞાનિક, મેનેજીંગ ટ્રસ્ટી, સારથી ટ્રસ્ટ, જોધપુરે જણાવ્યું હતું કે, ફેમિલી કોર્ટ ભીલવાડાએ માનસીના બાળ લગ્ન રદ કરવાનો ઐતિહાસિક નિર્ણય આપ્યો હતો. માનનીય ન્યાયમૂર્તિ હરિવલ્લભ ખત્રી સાહેબે બાળલગ્ન મુદ્દે સંવેદનશીલતા દર્શાવી અને લગ્ન રદ કર્યા હતા. હવે અમે બાલિકા વધૂ માનસીના શ્રેષ્ઠ પુનર્વસન માટે પ્રયાસ કરી રહ્યા છીએ.