November 18, 2024
આખરે પાકિસ્તાને ભારતના દબાણ સામે ઝૂકવું પડ્યું. પાકિસ્તાનના પંજાબ પ્રાંતમાં તોડી પાડવામાં આવેલા મંદિરની મરામત કરવામાં આવી હતી અને ત્યારબાદ હિન્દુ સમુદાયને સોંપવામાં આવ્યું છે. એક સરકારી અધિકારીએ સોમવારે આ માહિતી આપી છે. જિલ્લા વહીવટકર્તા ખુર્રમ શહજાદે કહ્યું કે સ્થાનિક હિન્દુઓ ટૂંક સમયમાં જ મંદિરમાં પૂજા શરૂ કરશે.
4 ઓગસ્ટના રોજ લાહોરથી 590 કિલોમીટર દૂર પ્રાંતના રહીમ યાર ખાન જિલ્લાના ભોંગ શહેરમાં એક ટોળાએ ગણેશ મંદિર પર હુમલો કર્યો હતો. સ્થાનિક મદરેસામાં કથિત રીતે પેશાબ કરવા બદલ ધરપકડ કરાયેલા આઠ વર્ષના હિન્દુ છોકરાની કોર્ટ દ્વારા મુક્તિના વિરોધમાં ટોળાએ મંદિર પર હુમલો કર્યો હતો.
પાકિસ્તાનની કાયદા અમલીકરણ એજન્સીઓએ પંજાબ પ્રાંતના દૂરના શહેરમાં હિન્દુ મંદિર પર હુમલો કરવા બદલ 50 થી વધુ લોકોની ધરપકડ કરી છે અને 150 થી વધુ લોકો સામે ગુનો નોંધ્યો છે. અગાઉ, પાકિસ્તાનની સુપ્રીમ કોર્ટે મંદિરની સુરક્ષામાં નિષ્ફળતા બદલ અધિકારીઓને ઠપકો આપ્યો હતો.
Trending News
પાકિસ્તાનના મુખ્ય ન્યાયાધીશ ગુલઝાર અહમદે શુક્રવારે કહ્યું કે, મંદિરમાં તોડફોડ દેશ માટે શરમજનક છે કારણ કે પોલીસ મૌન દર્શક રહી છે. આઠ વર્ષના બાળકની ધરપકડ પર આશ્ચર્ય વ્યક્ત કરતા ચીફ જસ્ટિસે પોલીસને પૂછ્યું હતું કે શું તેઓ આટલા નાના બાળકની માનસિક સ્થિતિ સમજી શકતા નથી. પાકિસ્તાનની સંસદે શુક્રવારે મંદિર પર હુમલાની ઘટનાને વખોડતો ઠરાવ પસાર કર્યો હતો. આ કેસની સુનાવણી 13 ઓગસ્ટ સુધી મુલતવી રાખવામાં આવી છે.
આ સિવાય નેશનલ એસેમ્બલીએ સર્વાનુમતે હુમલાની નિંદા કરતો ઠરાવ પસાર કર્યો હતો. ભારતે ગુરુવારે નવી દિલ્હીમાં પાકિસ્તાની હાઇ કમિશનના પ્રભારીને બોલાવ્યા હતા અને પાકિસ્તાનમાં લઘુમતી સમુદાયની સ્વતંત્રતા અને તેમના ધાર્મિક સ્થળો પર સતત વધતા જતા હુમલાની ઘટના સામે સખત વિરોધ નોંધાવ્યો હતો.
હિન્દુઓ પાકિસ્તાનમાં સૌથી મોટો લઘુમતી સમુદાય છે. સત્તાવાર અંદાજ મુજબ પાકિસ્તાનમાં 7.5 મિલિયન હિંદુઓ રહે છે. જો કે સમુદાય અનુસાર, દેશમાં 90 લાખથી વધુ હિન્દુઓ રહે છે. પાકિસ્તાનની મોટાભાગની હિન્દુ વસ્તી સિંધ પ્રાંતમાં સ્થાયી છે, જ્યાં તેઓ મુસ્લિમ રહેવાસીઓ સાથે સંસ્કૃતિ, પરંપરા અને ભાષા બોલે છે. તેઓ વારંવાર ઉગ્રવાદીઓ દ્વારા સતામણીની ફરિયાદ કરે છે.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.