તળાવમાં નાહવા તો પડ્યા, પણ કોને ખબર જિંદગીનો છેલ્લો દિવસ હશે! ડૂબી જતાં એક સાથે 6 બાળકોના મોત

હરિયાણા(Haryana)ના ગુરુગ્રામ(Gurugram)માં રવિવારે વરસાદી પાણીથી ભરેલા તળાવમાં ન્હાતી વખતે છ બાળકો ડૂબી ગયા. પોલીસના જણાવ્યા અનુસાર, ડૂબનારાઓમાં તમામ છ છોકરાઓ હતા, જેમની ઉંમર આઠથી 13 વર્ષની વચ્ચે હોવાનું કહેવાય છે. તમામ બાળકોના મૃતદેહ(Six children died) મળી આવ્યા છે.

પોલીસના જણાવ્યા અનુસાર મૃતકોની ઓળખ દુર્ગેશ, અજીત, રાહુલ, પીયૂષ, દેવા અને વરુણ તરીકે થઈ છે. તમામ શંકર વિહાર કોલોનીના રહેવાસી હતા અને રવિવારે બપોરે તળાવમાં ન્હાવા ગયા હતા.

ડીએમ નિશાંત યાદવે જણાવ્યું કે, ગુરુગ્રામમાં તમામ 6 બાળકોના મૃતદેહ મળી આવ્યા છે. તમામ બાળકોની ઉંમર 8 થી 13 વર્ષની વચ્ચે હતી. જો અન્ય કોઈ બાળક ગુમ હોય તો અમને જાણ કરવા માટે અમે સ્થાનિક વિસ્તારમાં જાહેરાત કરી રહ્યા છીએ. જરૂર પડશે તો અમે ફરીથી તળાવની શોધ કરીશું અથવા તેનું પાણી કાઢી લઈશું.

આ ઘટનાની માહિતી મળતાં જ પોલીસ, સ્ટેટ ડિઝાસ્ટર રિસ્પોન્સ ફોર્સ, સિવિલ ડિફેન્સ, નેશનલ ડિઝાસ્ટર રિસ્પોન્સ ફોર્સ અને ફાયર બ્રિગેડના જવાનોની ટીમો ઘટનાસ્થળે મોકલવામાં આવી હતી અને મૃતદેહોને તળાવમાંથી બહાર કાઢવામાં આવ્યા હતા. આ અભિયાન ચાર કલાક સુધી ચાલ્યું હતું.