ભાવનગર: લગ્ન બાદ પહેલીવાર જઈ રહ્યો હતો સાસરે, ત્યાં માર્ગમાં નડ્યો અકસ્માત- પતિનું ઘટના સ્થળે જ નીપજ્યું કરુણ મોત 

ભાવનગર(ગુજરાત): અકસ્માતના બનાવોમાં દિવસેને દિવસે વધારો જોવા મળ્યો છે. આ દરમિયાન રાજ્યમાં ફરીવાર એક ગંભીર અકસ્માત સામે આવ્યો છે. જેમાં 15 દિવસ પહેલા જ થેયલા લગ્ન બાદ પોતાની પત્નીને પ્રથમ વખત સાસરે મુકવા જનારા યુવકને ગમખ્વાર અકસ્માત નડ્યો અને ઘટના સ્થળે જ તેનું મોત નીપજ્યું હતું. જયારે તેની પત્નીને ગંભીર ઈજાઓ પહોંચી હતી.

મળતી માહિતી મુજબ, 29 વર્ષીય આશિષભાઇ બહાદુરભાઈ માવરિયાના લગ્ન 15 દિવસ પહેલા જ જયશ્રી બેન સાથે થયા હતા. આશિષભાઇ લગ્ન બાદ પ્રથમ વખત પોતાની પત્ની સાથે એક્ટિવા ઉપર પોતાના સાસરિયે જઈ રહ્યા હતા.

આ દરમિયાન, વરતેજ એસ્સાર પેટ્રોલ પમ્પ નજીક પાછળથી પૂર ઝડપે આવી રહેલા ડમ્પરે તેમના એક્ટિવાને ટક્કર મારી હતી જેની અંદર આશીષભાઈનું ઘટના સ્થળે જ કરુણ મોત નીપજ્યું હતું. જયારે તેમની પત્ની જયશ્રીબેનને ગંભીર ઈજાઓ પહોંચી હતી અને તેમને સારવાર માટે સર.ટી હોસ્પિટલમાં લઈ જવામાં આવ્યા હોવાનું સામે આવ્યું છે.