ભારત માટે ગૌરવની વાત: સ્માર્ટ સિટીમાં બન્યો એશિયાનો સૌથી મોટો બાયો CNG પ્લાન્ટ- PM મોદીના હસ્તે થશે ઉદ્ઘાટન

એશિયા(Asia)ના સૌથી મોટા બાયોમેથેનેશન પ્લાન્ટ્સ ઈન્દોર દેશના સૌથી સ્વચ્છ શહેર ઈન્દોરમાં પૂર્ણ થયા છે, જે એશિયાના સૌથી મોટા અને દેશના પ્રથમ વેસ્ટ ટુ બાયો-સીએનજી ગેસ(Asia’s Largest Biomethanation Plants Indore) ઉત્પાદન પ્લાન્ટ છે. હવે તેના ઉદ્ઘાટન માટે વડાપ્રધાન નરેન્દ્ર મોદી(Narendra Modi)ને ઈન્દોર બોલાવવાની તૈયારીઓ ચાલી રહી છે. 150 કરોડના ખર્ચે બનેલો આ પ્લાન્ટ દરરોજ 18 હજાર લિટર બાયો-સીએનજી ગેસનું ઉત્પાદન કરશે. આ સાથે 100 ટન ખાતર પણ તૈયાર થશે. આ પ્લાન્ટ દેવગુરાડિયાની ટેકરી પર સ્થિત દેવગુરાડિયા ટ્રેન્ચિંગ ગ્રાઉન્ડ પર સ્થિત છે.

મળતી માહિતી મુજબ શહેરની સિટી બસો આ ગેસથી ચલાવવામાં આવશે. તેમજ પાલિકાના વાહનો પણ આ ગેસ પર ચાલશે. ઈન્દોરના સાંસદ શંકર લાલવાણીએ કહ્યું કે ઈન્દોર માટે આ બીજી અનોખી સિદ્ધિ હશે, જેણે ચાર વખત દેશના સૌથી સ્વચ્છ શહેરનો ખિતાબ જીત્યો છે. આખા દેશમાં આ પહેલો એવો પ્લાન્ટ હશે જ્યાં શહેરમાંથી એકઠા કરવામાં આવતા કચરામાંથી સીએનજી ગેસ બનાવવામાં આવશે અને તેમાંથી સિટી બસો ચલાવવામાં આવશે. તેમણે કહ્યું કે કોવિડને કારણે તેને પૂર્ણ કરવામાં થોડો સમય લાગ્યો. કારણ કે, પ્લાન્ટના ઘણા ભાગો વિદેશથી મંગાવવામાં આવ્યા છે. હવે તે પૂર્ણ થશે અને વડાપ્રધાન નરેન્દ્ર મોદીના હસ્તે આ પ્લાન્ટનું ઉદ્ઘાટન કરવામાં આવશે. ઈન્દોર માટે આ એક મોટી ઉપલબ્ધિ છે.

મહાનગરપાલિકાને પણ કમાણી થશે:
મ્યુનિસિપલ કમિશનર પ્રતિભા પાલે જણાવ્યું હતું કે આ પ્લાન્ટ દરરોજ 18,000 લિટર બાયો-સીએનજી સાથે 100 ટન સારી ગુણવત્તાયુક્ત સિટી કમ્પોસ્ટ તૈયાર કરશે. આ બાયો-સીએનજી ગેસનો ઉપયોગ સિટી બસો અને અન્ય નાના વાહનો માટે વાહન બળતણ તરીકે કરવામાં આવશે. સિટી કમ્પોસ્ટનો ઉપયોગ ખેડૂતોના ખેતરોની ખાતર ક્ષમતા વધારવા માટે કરવામાં આવશે. આ પ્રોજેક્ટમાં 500 TPD ઓર્ગેનિક મ્યુનિસિપલ ઘન કચરા પર પ્રક્રિયા કરવામાં આવશે. મહાનગરપાલિકા 50 ટકા સીએનજી ગેસ અને સિટી કમ્પોસ્ટનું પણ વેચાણ કરશે. આનાથી કોર્પોરેશનને નોંધપાત્ર આવક થશે. આ સાથે કોર્પોરેશનને દર વર્ષે 1.5 કરોડનું પ્રિમિયમ પણ મળશે.