ધમાલ મચાવી રહી છે મુકેશ અંબાણીની નવી કંપની, માર્કેટમાં એન્ટ્રી થતા જ નફો થયો બમણો

Jio Financial Result: એશિયાના સૌથી ધનાઢ્ય વ્યક્તિ મુકેશ અંબાણીના રિલાયન્સ ગ્રુપની નવી કંપની Jio ફાયનાન્સિયલ સર્વિસે શેરબજારમાં લિસ્ટિંગ સાથે અજાયબીઓ કરી છે. કંપનીએ આ નાણાકીય વર્ષના બીજા ક્વાર્ટરના પરિણામો જાહેર કર્યા છે અને કહ્યું છે કે આ સમયગાળા દરમિયાન કંપનીનો નફો 101 ટકા વધીને 668 કરોડ રૂપિયા થઈ ગયો છે. આ સાથે કંપનીની આવકમાં પણ જોરદાર વધારો જોવા મળ્યો છે.

ગયા વર્ષની સરખામણીમાં બમણો નફો
રિલાયન્સ ઇન્ડસ્ટ્રીઝની પેટાકંપની જિયો ફાઇનાન્સિયલ સર્વિસે તેના બીજા ક્વાર્ટરના પરિણામોની જાહેરાત કરતી વખતે જણાવ્યું હતું કે ગયા વર્ષની સરખામણીમાં કંપનીનો નફો બમણો થયો છે. રિલાયન્સ ઈન્ડસ્ટ્રીઝથી અલગ થઈને નવી કંપની બનાવતા પહેલા કંપનીનો ગયા નાણાકીય વર્ષના બીજા ક્વાર્ટરમાં ટેક્સ પછીનો એકીકૃત નફો રૂ. 371 કરોડ હતો, જે આ વખતે રૂ. 668 કરોડના સ્તરે પહોંચી ગયો છે. જો આપણે તે મુજબ જોઈએ તો, કંપનીએ 101 ટકા વૃદ્ધિ નોંધાવી છે.

આવકમાં 46 ટકાથી વધુનો વધારો
ત્રિમાસિક પરિણામો અનુસાર, છેલ્લા ક્વાર્ટરમાં કંપનીની આવક રૂ. 608 કરોડ નોંધાઈ છે, જે ગયા વર્ષના સમાન ક્વાર્ટરમાં રૂ. 414 કરોડ હતી. જેમાં 46.82 ટકાનો વધારો જોવા મળ્યો છે. તેનાથી વિપરીત, કંપનીની વ્યાજ આવક (Jio Fin Interest Income) 7.86 ટકા ઘટીને રૂ. 186 કરોડ થઈ છે. પ્રી-પ્રોવિઝનિંગ ઓપરેટિંગ નફો 48.93 ટકા વધીને રૂ. 537 કરોડ થયો છે જે ક્વાર્ટર-દર-ક્વાર્ટર રૂ. 360 કરોડ હતો.

ઓગસ્ટમાં માર્કેટમાં લિસ્ટ થઈ હતી કંપની 
અત્રે નોંધનીય છે કે, જુલાઈ-સપ્ટેમ્બર ક્વાર્ટર સુધી કંપનીનું કુલ માર્કેટ કેપ 1.43 લાખ કરોડ રૂપિયા હતું, જે હવે વધીને 1.45 લાખ કરોડ રૂપિયા થઈ ગયું છે. મુકેશ અંબાણીની આ કંપની આ વર્ષે રિલાયન્સ ઈન્ડસ્ટ્રીઝથી અલગ થઈને અસ્તિત્વમાં આવી હતી અને તેના શેર 21 ઓગસ્ટ 2023ના રોજ શેર માર્કેટમાં લિસ્ટ થયા હતા. Jio Financial Ltdનો શેર બોમ્બે સ્ટોક એક્સચેન્જ (BSE) પર રૂ. 265 અને નેશનલ સ્ટોક એક્સચેન્જ (NSE) પર રૂ. 262 પર લિસ્ટ થયો હતો.