સુરત ઉત્તરની બેઠક પર ભાજપે મારી બાજી- જાણો કેટલી લીડથી જીત્યા કાંતિ બલર

સુરત(Surat): શહેરમાં કુલ 16 વિધાનસભા સીટ પર ચૂંટણીનો ખરાખરીનો જંગ ખેલાયો હતો. અહીં માનવામાં આવતુ હતુ કે, ભાજપ અને AAP વચ્ચે રસાકસીનો માહોલ જોવા મળશે. પરંતુ અહીં ભાજપે સુરત શહેર અને જિલ્લાની કુલ 16 બેઠક જીતીને આમ આદમી પાર્ટીના સુપડા સાફ કરી દીધા છે. ત્યારે સુરત ઉત્તર વિધાનસભા બેઠક પર ભાજપના ઉમેદવાર કાંતિ બલર, આમ આદમી પાર્ટીના ઉમેદવાર મહેન્દ્ર નાવડિયા અને કોંગ્રેસના ઉમેદવાર અશોક પટેલ વચ્ચે ચુંટણી જંગ જામ્યો હતો.

જાણો કોને કેટલા મત મળ્યા:
જો વાત કરવામાં આવે તો સુરત ઉત્તરની આ બેઠક પર ભાજપના ઉમેદવારની જીત થઇ છે. જણાવી દઈએ કે, કાંતિ બલરને 57,117 મત મળ્યા હતા. જયારે આમ આદમી પાર્ટીના ઉમેદવાર મહેન્દ્ર નાવડિયાને 22,824 મત મળ્યા હતા. જયારે કોંગ્રેસના ઉમેદવાર અશોક પટેલને 14,854 મત મળ્યા હતા. ભાજપના ઉમેદવાર કાંતિ બલર 34,293ની લીડથી વિજયી બન્યા હતા.

ગુજરાતની વિધાનસભા ચૂંટણીના પરિણામો બાદ જનતાએ અગાઉના તમામ ચૂંટણીના રેકોર્ડ તોડીને ભાજપને મહત્તમ બેઠકો આપીને એક નવો ઈતિહાસ રચ્યો છે. ગુજરાત વિધાનસભાની ચૂંટણીમાં ભાજપે 156 સીટ મેળવીને પ્રચંડ વિજય મેળવ્યો છે, જયારે કોંગ્રેસ પાર્ટીને 17 સીટ મળી છે અને આમ આદમી પાર્ટીનો 5 બેઠક પર વિજય થયો છે. જયારે અપક્ષને 4 બેઠક મળી છે. માત્ર તેટલું જ નહીં, ગુજરાતની જનતાના 52 % મત ભાજપને મળ્યા છે.

12 ડિસેમ્બરના રોજ નવી સરકારની થશે શપથવિધિ:
ભાજપની પ્રચંડ જીતની કમલમમાં ભવ્ય ઉજવણી કરવામા આવી હતી. જીત પછી સીઆર પાટીલ અને મુખ્યમંત્રી ભુપેન્દ્ર પટેલે એકબીજાને મીઠાઈ ખવડાવીને એક બીજાના મોઢા મીઠા કરાવ્યા હતા. જે બાદમાં 12 ડિસેમ્બરના રોજ નવી સરકારની શપથવિધિ સમારોહની જાહેરાત કરવામાં આવી હતી. જોકે અહી શપથવિધિ કયા યોજાશે તેને લઈને પણ અનેક ચર્ચાઓ ચાલી રહી છે.