સુરત પૂર્વમાં કમળ ખીલ્યું, લહેરાયો ભગવો- જાણો કેટલી લીડથી જીત્યા અરવિંદ રાણા

સુરત(Surat): શહેરમાં કુલ 16 વિધાનસભા સીટ પર ચૂંટણીનો ખરાખરીનો જંગ ખેલાયો હતો. અહીં માનવામાં આવતુ હતુ કે, ભાજપ અને AAP વચ્ચે રસાકસીનો માહોલ જોવા મળશે. પરંતુ અહીં ભાજપે સુરત શહેર અને જિલ્લાની કુલ 16 બેઠક જીતીને આમ આદમી પાર્ટીના સુપડા સાફ કરી દીધા છે. ત્યારે સુરત પૂર્વ વિધાનસભા બેઠક પર ભાજપના ઉમેદવાર અરવિંદ રાણા અને કોંગ્રેસના ઉમેદવાર અસલમ સાયકલવાલા વચ્ચે ચુંટણી જંગ જામ્યો હતો.

જાણો કોને કેટલા મત મળ્યા:
જો વાત કરવામાં આવે તો સુરત પૂર્વની આ બેઠક પર ભાજપના ઉમેદવારની ભવ્ય જીત થઇ છે. જણાવી દઈએ કે, અરવિંદ રાણાને 73,142 મત મળ્યા હતા. જયારે કોંગ્રેસના ઉમેદવાર અસલમ સાયકલવાલાને 59,125 મત મળ્યા હતા. ભાજપના ઉમેદવાર અરવિંદ રાણા 14,017ની લીડથી વિજયી બન્યા હતા.

ગુજરાતની વિધાનસભા ચૂંટણીના પરિણામો બાદ જનતાએ અગાઉના તમામ ચૂંટણીના રેકોર્ડ તોડીને ભાજપને મહત્તમ બેઠકો આપીને એક નવો ઈતિહાસ રચ્યો છે. ગુજરાત વિધાનસભાની ચૂંટણીમાં ભાજપે 156 સીટ મેળવીને પ્રચંડ વિજય મેળવ્યો છે, જયારે કોંગ્રેસ પાર્ટીને 17 સીટ મળી છે અને આમ આદમી પાર્ટીનો 5 બેઠક પર વિજય થયો છે. જયારે અપક્ષને 4 બેઠક મળી છે. માત્ર તેટલું જ નહીં, ગુજરાતની જનતાના 52 % મત ભાજપને મળ્યા છે.

12 ડિસેમ્બરના રોજ નવી સરકારની થશે શપથવિધિ:
ભાજપની પ્રચંડ જીતની કમલમમાં ભવ્ય ઉજવણી કરવામા આવી હતી. જીત પછી સીઆર પાટીલ અને મુખ્યમંત્રી ભુપેન્દ્ર પટેલે એકબીજાને મીઠાઈ ખવડાવીને એક બીજાના મોઢા મીઠા કરાવ્યા હતા. જે બાદમાં 12 ડિસેમ્બરના રોજ નવી સરકારની શપથવિધિ સમારોહની જાહેરાત કરવામાં આવી હતી. જોકે અહી શપથવિધિ કયા યોજાશે તેને લઈને પણ અનેક ચર્ચાઓ ચાલી રહી છે.