ગુજરાતમાં અડધી રાત્રે આ ખાનગી ટ્રાવેલ્સને નડ્યો ભયંકર અકસ્માત, 100થી વધુ મુસાફરો થયા ઈજાગ્રસ્ત

ઉતર ગુજરાતમાં આવેલ મહીસાગર જિલ્લામાં મોડી રાત્રે એક ખાનગી બસને અકસ્માત નડ્યો છે. અહીં મુસાફરોથી ખીચોખીચ ભરેલી ખાનગી ટ્રાવેલ્સની એક બસ પલટી ગઈ હતી. મહીસાગર જિલ્લામાં આવેલ સંતરામપુરના પઢારિયા ગામે ખાનગી બસ પલટી જતા 100થી વધુ લોકો ઈજાગ્રસ્ત થયા હોવાનું જાણવા મળી રહ્યું છે. ઇજાગ્રસ્તોને સારવાર અર્થે લુણાવાડાની સિવિલ હોસ્પિટલમાં ખસેડવામાં આવ્યા છે. જ્યારે કેટલાક ઇજાગ્રસ્તોને વધુ સારવાર માટે ગોધરા હોસ્પીટલમાં ખસેડવામાં આવ્યા છે.

મળતી માહિતી પ્રમાણે, બસમાં 100 જેટલા મુસાફરો સવારી કરી રહ્યા હતા. હાલ કોરોનાનું સંક્રમણ વધી રહ્યું છે ત્યારે ખાનગી બસોમાં સોશિયલ ડિસ્ટન્સિંગ સાથે 60 ટકા મુસાફરો ભરવાની જ છૂટ આપવામાં આવી છે. ત્યારે આ બસમાં નિયમોને નેવે મૂકીને 100 મુસાફરો ભરવામાં આવ્યા હતા. સામાન્ય રીતે બસની કેપેસિટી 40થી 45 મુસાફરોની હોય છે, પરતું આ બસમાં કેપેસિટીના બે ગણાથી પણ વધારે મુસાફરો ભરી દેવામાં આવ્યા હતા.

મહીસાગર જિલ્લામાં આવેલ સંતરામપુરના પઢારિયા ગામ નજીક મુસાફરો લઇને જતી એક ખાનગી બસ પલટી મારી ગઇ હતી. આ બસની અંદર મોટાભાગના મજૂર મુસાફરો હોવાનું જાણવા મળી રહ્યું છે. આ અકસ્માતની ઘટનાની જાણ થતા આસપાસના સ્થાનિકો ઘટના સ્થળ પર પહોંચી ગયા હતા અને 108 તેમજ પોલીસને જાણ કરવામાં આવી હતી. ત્યારે સ્થાનિક અને 108ની મદદથી મુસાફરોને બહાર કાઢવામાં આવ્યા હતા. આ અક્સમાતની ઘટનામાં મુસાફરોને નાની મોટી ઈજા પહોંચી છે. જો કે, કોઈ જાનહાનીના સમાચાર હજુ સુધી સામે આવ્યા નથી.