માસ્ક બનાવતી ફેકટરીમાં ભભૂકી ઉઠી આગ, 1નું મોત 2 ઘાયલ

દિલ્હીમાં આજે સવારે માસ્ક બનાવતી ફેક્ટરીમાં આગ ભભૂકી ઉઠી હતી. આ અકસ્માતમાં એક વ્યક્તિનું મોત નીપજ્યું હતું. ઘટના સ્થળે પહોંચેલા બચાવકારોએ બે લોકોને બચાવ્યા હતા. બંને યુવાનો સાધારણ રીતે દાઝી ગયા છે. ઘાયલોને હોસ્પિટલમાં દાખલ કરવામાં આવ્યા છે. અત્યારે આગને કાબૂમાં લેવામાં આવી છે. આગ લાગવાનું કારણ જાણી શકાયું નથી.

ઘટના દિલ્હીના માયાપુરી વિસ્તારની છે. મળેલી માહિતી અનુસાર માસ્ક બનાવવાની ફેક્ટરી બિલ્ડિંગના ત્રીજા માળે હતી. આ વિસ્તાર 200 ચોરસ યાર્ડમાં ફેલાયેલો છે. આજે ત્યાં અચાનક આગ લાગતાં મશીન અને કાચો માલ આગમાં બળી ગયા હતા. નજીકના લોકોએ તુરંત જ મકાનમાંથી ધુમાડો નીકળતો જોયો અને ફાયર બ્રિગેડને ફોન કરી તેની જાણ કરી.

ફાયર બ્રિગેડ સ્થળ પર પહોંચી અને મકાનમાં ફસાયેલા ત્રણ લોકોને બહાર કાઢ્યા. તેને તાત્કાલિક DDU હોસ્પિટલમાં લઈ જવામાં આવ્યો, જ્યાં સીએમઓએ એક વ્યક્તિને મૃત જાહેર કર્યો. મૃતકનું નામ જુગલ કિશોર હતું. ઘાયલ અમન અંસારી અને ફિરોઝ અન્સારીની હોસ્પિટલમાં સારવાર ચાલી રહી છે. ફાયર બ્રિગેડના અનેક વિભાગોએ ભારે મુશ્કેલીથી આગ પર કાબૂ મેળવ્યો. હાલમાં આગ લાગવાનું કારણ જાણવાની કોશિશ કરવામાં આવી રહી છે.