‘હું હિંમત હારી ગઈ છું, મારું મગજ ગાંડુ થઈ ગયું છે’ મહિલા પ્રિન્સિપાલે સુસાઇડ નોટ લખીને કર્યો આપઘાત

છોટાઉદેપુર જિલ્લાના નસવાડી તાલુકાના કુકરદા સરકારી મધ્યામિક શાળાના શૌચાલયમાં મહિલા પ્રિન્સિપાલે ગળેફાંસો ખાઈને આપઘાત કરી લેતા સમગ્ર પંથકમાં ચકચાર મચી જવા પામી છે. નસવાડી પોલીસે તપાસ કરતા મૃતદેહ પાસેથી ચાર પાનાની સુસાઇડ નોટ મળી આવી હતી.

મહિલાએ સુસાઇડ નોટમાં લખ્યું છે કે, તેણે આ પગલું કોઈના પણ દબાણમાં આવ્યા વગર જાતે જ આપઘાત કર્યો છે. છેલ્લા ઘણા મહિનાઓથી તેની માનસિક સ્થિતિ ખુબ જ ખરાબ હોવાનું કહ્યું છે. સાથે જ મહિલાએ ઘરના તમામ લોકોની માફી માંગી છે. આ સુસાઇડ નોટમાં પતિને સંબોધીને લખવામાં આવ્યું છે કે, બંને બાળકોને સાચવજો.

સાથે આ સુસાઇડ નોટમાં લખ્યું છે કે, હું ડામોર ભાવનાબેન હોશમાં રહીને આ સુસાઇડ નોટ લખું છું.’ મારી મોત પાછળ હું ખુદ જ જવાબદાર છું. છેલ્લા કેટલાક મહિનાથી મારી માનસિક સ્થિતિ ખુબ જ ખરાબ છે. મારા વિચારો મારા કાબુમાં જ નથી રહેતા. હું હિંમત હારી ગઈ છું. મેં ખુબ મહેનત કરી આગળ વધવા પરંતુ મારું મગજ ગાંડુ થઇ ગયું છે મને મરવાની સ્થિતિમાંથી બહાર જ નથી નીકળવા દેતું’

સાથે તેમને આ સુસાઇડ નોટમાં લખ્યું છે કે, ‘ભગવાને મને બધું જ આપ્યું છે. હું તેમનો ખુબ આભાર માનું છું. મારો જીવ મારા પતી અને બે બાળકોમાં રહેશે. મારા પતિએ પણ મને ખુબ જ સપોર્ટ કર્યો છે. અમે બંને એક બીજાને ખુબ જ પ્રેમ કરીએ છીએ.’