ગુજરાતના આ શહેરમાં ધમધમી રહ્યું હતું બોગસ કોલ સેન્ટર: પોલીસે દરોડા પાડ્યા તો…

પાટણ(ગુજરાત): આજકાલ પોલીસ ઘણા કોલ સેન્ટર અને કૂટણખાના પર રેડ પાડી રહી છે. આ દરમિયાન પાટણ(ગુજરાત) શહેરના સિધ્ધપુર પંથકમાં LCBની ટીમ દ્વારા કોલ સેન્ટર પર રેઇડ કરી બે ઇસમોને ઝડપી પાડવામાં આવ્યા છે. ગઇકાલે મોડી રાતથી વહેલી સવાર સુધી ચાલેલી કાર્યવાહીમાં ઇસમોની પુછપરછ દરમિયાન ચોંકાવનારી વિગતો બહાર આવી હતી.

જેમાં ઇસમો અમેરીકામાં રહી લોન માટે એપ્લાય કરતાં વ્યક્તિઓને વાતોમાં ભોળવી ગિફ્ટ કાર્ડ મારફતે પૈસા ટ્રાન્સફર કરાવી છેતરપિંડી કરતાં હોવાનું સામે આવ્યું હતુ. LCBની ટીમ દ્વારા 2 ઇસમને ઝડપી પાડી અન્ય 3 મળી કુલ 5 ઇસમ વિરૂધ્ધ સિધ્ધપુર પોલીસ મથકે ગુનો રજીસ્ટર કરવામાં આવ્યો હોવાની માહિતી મળી છે.

રેન્જ આઇજી જે.આર.મોથાલિયા અને પાટણ SP અક્ષયરાજ દ્વારા જીલ્લામાં કાયદો અને વ્યવસ્થાની સ્થિતિ જાળવવા સુચના આપવામાં આવી છે. જે અનુસંધાને LCB PI એ.બી.ભટ્ટ સહિતની ટીમના અંબાલાલ, મોડજી,જયેશજી અને રાહુલ કુમાર પેટ્રોલિંગમાં હતી.

આ દરમિયાન LCBના પોલીસ કોન્સ્ટેબલ મોડજીજીને ચોક્કસ બાતમી મળી હતી કે, દેથળી ગામથી તાવડીયા જવાના રસ્તા પર આવેલ પેરેડાઇઝ વીલામાં ઇસમ અમેરીકામાં રહેતાં અને લોન માટે એપ્લાય કરતાં ઇસમોને છેતરીને પૈસા પડાવવામાં આવી રહ્યા છે. જેથી ચોક્કસ બાતમી આધારે રેઇડ કરી 2 ઇસમો અને કોમ્પ્યુટર સહિતનો મુદ્દામાલ જપ્ત કરવામાં આવ્યો હતો.