November 28, 2024
હત્યા (Murder)ની ઘટનાઓ દિવસેને દિવસે વધતી જણાઈ રહી છે. લોકો નજીવી બાબતે કોઈની પણ હત્યા કરી નાખતા હોય છે. હાલ આવી જ એક ઘટના સામે આવી છે. ચીખલીના નોગામા(Nogama) ગામે નજીવી બાબતે બોલાચાલી થતા બે યુવાને અન્ય એક યુવકનું ગળું દબાવી હત્યા કરી હતી. હાલ આ મામલે પોલીસે હત્યાનો ગુનો નોંધી બંને આરોપીની ધરપકડ કરી છે. તેમજ આ અંગે વધુ તપાસ હાથ ધરવામાં આવી છે.
વાસ્તવમાં, ચીખલી તાલુકાના નોગામા ગામના પહાડ ફળિયામાં રહેતા આશીક વિનોદભાઈ પટેલ (26) શુક્રવારે સાંજના 6 વાગ્યાના અરસામાં પહાડ ફળિયામાં મિત્રો સાથે બેઠો હતો. ત્યારે દિપક દિનેશભાઈ પટેલ અને પ્રકાશ ઉર્ફે પંકજ નગીનભાઈ પટેલ ત્યાંથી પસાર થતા હતા. આ દરમિયાન આશીકને કોઈપણ કારણો વગર ગાળો આપી હતી. ત્યારબાદ આશીક રાત્રિના 9.30 વાગ્યાના અરસામાં દિપક પટેલ(25) અને પ્રકાશ ઉર્ફે પંકજ પટેલના ઘરે ગયો હતો. ત્યાં આશિકે દિપક તેમજ પ્રકાશને ગાળો કેમ આપી તે બાબતે પૂછ્યું હતું.
Trending News
અમર પટેલને પણ ગાળો આપી ઢીકમુક્કીનો માર માર્યો:
ત્યારબાદ બંને આરોપીઓએ આશિકને ઘરે ચાલ્યો જા, નહીં તો અહીંય જ પતાવી દઇશું તેવી ધમકી આપી હતી. આ પછી દિપક પટેલે આચાનક જ ઉશ્કેરાઈ જઇ આશીક પટેલના બન્ને હાથ પકડી રાખી તેમજ પ્રકાશ ઉર્ફે પંકજ પટેલે ગળાના ભાગ જોરથી દબાવી રાખ્યું હતું. જેને પગલે પત્ની તેમજ મિત્ર કલ્પેશ પટેલ, અમર પટેલ છોડાવવા જતા તેને પણ ગાળો આપી ઢીકમુક્કીનો માર માર્યો હતો.
આ પછી આશીક પટેલને 108ની મદદથી સારવાર અર્થે હોસ્પિટલ ખસેડવામાં આવ્યો હતો. જ્યાં ફરજ પરના તબીબે મૃત જાહેર કર્યો હતો. આ બનાવની ફરિયાદ મૃતકની પત્ની દીનાબેન પટેલ(25) એ કરતા પોલીસે આરોપી દિપક પટેલ, પ્રકાશ ઉર્ફે પંકજ પટેલ સામે હત્યાનો ગુનો નોંધી ધરપકડ કરી છે. હાલ આ અંગે વધુ તપાસ હાથ ધરવામાં આવી છે.
પરિવારે એકનો એક આધારસ્તંભ ગુમાવ્યો:
મળતી માહિતી અનુસાર, આશીક મજૂરી કામ કરી પોતાના પરિવારનું ભરણપોષણ કરતો હતો. તેના પરિવારમાં પત્ની અને વૃદ્ધ દાદીમા છે. આશીક પરિવારનો એક માત્ર આધારસ્તંભ હતો. આશીકના સાવકા પુત્રનું પણ એક વર્ષ અગાઉ બીમારીના કારણે અવસાન થયું હતું. જ્યારે આશીકના માતા-પિતાનું પણ ઘણા વર્ષો પહેલા મૃત્યુ થયું હતું. આશીકના મૃત્યુથી પરિવારે આધારસ્તંભ ખોયો છે. આશીકના મૃત્યુને પગલે તેના પરિવાર તેમજ ગામમાં પણ શોકની લાગણી પ્રસરી ગઈ છે.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.