સુરતમાં મેઘરાજાની સવારી: સિટીમાં દોઢ ઇંચ, ચાર તાલુકામાં અડધો ઇંચ વરસાદ

ભારે થી અતિભારે વરસાદની આગાહી વચ્ચે આજે સુરત જિલ્લાના ચાર તાલુકામાં અડધો ઇંચ વરસાદ સહિત બાકીના તાલુકામાં છુટોછવાયો વરસાદ નોંધાયો હતો. જયારે સુરત શહેરમાં દિવસના દોઢ ઇંચ વરસાદી પાણી પડયુ હતુ. તેમાંય પણ સિટીના બે ઝોનમાં બે ઇંચ વરસાદ પડી ગયો હતો.

ફલંડ કંટ્રોલના પ્રવકતાના જણાવ્યા મુજબ હવામાન વિભાગ દ્વારા સુરત જિલ્લામાં ભારે વરસાદની આગાહી કરાઇ હતી. આ આગાહીની સાથે જ આજે આખો દિવસ વાદળીયા હવામાન સાથે સતત ટીંપ ટીંપ વરસાદ ચાલુ જ રહ્યો હતો. સુરત જિલ્લાના ચાર તાલુકા બારડોલી, માંગરોળ, ઓલપાડ અને કામરેજમાં અડધો ઇંચ વરસાદ વરસ્યો હતો. જયારે બાકીના તાલુકામાં સામાન્ય વરસાદ થયો હતો.

સુરત શહેરમાં પણ દિવસના 12 કલાકમાં દોઢ ઇંચ વરસાદી પાણી પડવાની સાથે આખો દિવસ હિલ સ્ટેશન જેવા વાતાવરણ વચ્ચે સતત વરસાદથી વાતાવરણમાં ઠંડક પ્રસરી જતા શહેરીજનોને રાહત થઇ જવા પામી હત્યી. આજે લિંબાયત અને અઠવા ઝોન વિસ્તારમાં બે ઇંચ વરસાદ ખાબકયો હતો. જ્યારે કતારગામ,  સેન્ટ્રલ ઝોનમાં દોઢ ઇંચ વરસાદ પડયો હતો. વરાછા-એ ઝોનમાં 1 ઇંચ જ્યારે વરાછા-બી અને રાંદેર ઝોનમાં અડધો ઇંચ વરસાદ નોંધાયો હતો.