જનતા પર સવાર મોંઘવારીનો માર: અહિયાં પેટ્રોલના ભાવમાં એક સાથે વધારો થતા 250 પ્રતિ લીટર પહોંચી ગઈ કિંમત

પાકિસ્તાનના નાણા મંત્રી મિફ્તા ઈસ્માઈલે કહ્યું કે, સરકાર હવે વધુ સબસિડી સહન કરવાની સ્થિતિમાં નથી. પાકિસ્તાન સરકારે 6 બિલિયન ડોલરના અટવાયેલા બેલઆઉટ પેકેજને શરૂ કરવા માટે આ નિર્ણય લીધો છે. રોકડની સમસ્યાનો સામનો કરી રહેલા પાકિસ્તાનમાં ફરી એકવાર ઈંધણના ભાવમાં ભારે વધારો (Fuel Price Hike)  થયો છે.

પાકિસ્તાનના નાણા મંત્રાલય દ્વારા જારી કરાયેલા નોટિફિકેશન મુજબ, સરકારે પેટ્રોલ પર 10 રૂપિયા પ્રતિ લીટર અને હાઈ-સ્પીડ ડીઝલ (HSD), કેરોસીન અને લાઇટ ડીઝલ ઓઈલ (LDO) પર 5 રૂપિયા પ્રતિ લીટર પેટ્રોલિયમ વસૂલાત લાદી છે. જેના કારણે ઈંધણના ભાવમાં વધારો થયો છે. આ સાથે જ પેટ્રોલિયમ પેદાશોના ભાવમાં પણ ભારે વધારો થયો છે.

કેટલુ મોંઘુ થયું પેટ્રોલ 
પાકિસ્તાન સરકારના આ નિર્ણય બાદ પેટ્રોલની કિંમત 14.85 રૂપિયા પ્રતિ લીટર વધીને 248.74 રૂપિયા પ્રતિ લીટર થઈ ગઈ છે. હાઈ-સ્પીડ ડીઝલના ભાવમાં 13.23 રૂપિયા અને કેરોસીનના ભાવમાં 18.83 રૂપિયા પ્રતિ લીટરનો વધારો થયો છે. હવે પાકિસ્તાનમાં હાઈ સ્પીડ ડીઝલ 276.54 રૂપિયા પ્રતિ લીટર થઈ ગયું છે. કેરોસીન 230.26 રૂપિયા પ્રતિ લીટરના ભાવે વેચાઈ રહ્યું છે.

સરકારની ખરાબ હાલત
પાકિસ્તાનના નાણા મંત્રી મિફ્તા ઈસ્માઈલે ઈસ્લામાબાદમાં એક પ્રેસ કોન્ફરન્સને સંબોધતા કહ્યું હતું કે સરકાર હવે વધુ સબસિડી સહન કરવાની સ્થિતિમાં નથી. તેથી વધારો કરવાની જરૂર છે.