ફરી આમ જનતાને લાગવા જઈ રહ્યો છે મોટો ઝટકો- વીજળી બીલમાં થઇ શકે છે આટલાનો વધારો

દેશમાં ખુબ જ ઝડપી ગતિએ વધી રહેલી મોંઘવારી(Inflation) વચ્ચે હવે ફરી એક વખત વીજળીનો ‘આંચકો’ લાગી શકે છે. આકરી ગરમીમાં વીજળી(Electricity)ની માંગને પહોંચી વળવા સરકાર 76 મિલિયન ટન કોલસા(Coal)ની આયાત કરવાની તૈયારી કરી રહી છે.

વાસ્તવમાં દેશના પાવર પ્લાન્ટ્સની નજીકની સ્થાનિક ખાણોમાંથી કોલસાની અછત સર્જાઈ છે અને માંગ પ્રમાણે વીજળીનું ઉત્પાદન થઈ રહ્યું નથી. એવું માનવામાં આવે છે કે, ચોમાસાના વરસાદને કારણે ઓગસ્ટ અને સપ્ટેમ્બરમાં કોલસાના ઉત્પાદનને વધુ અસર થશે. આવી સ્થિતિમાં, માંગને પહોંચી વળવા માટે, સરકારી કંપની કોલ ઈન્ડિયા લિમિટેડ (CIL) લગભગ 15 મિલિયન ટન કોલસાની આયાત કરશે.

આ સિવાય દેશની સૌથી મોટી પાવર જનરેશન કંપની NTPC અને દામોદર વેલી કોર્પોરેશન (DVC) પણ લગભગ 23 મિલિયન ટન કોલસાની આયાત કરવાની યોજના બનાવી રહી છે. આ સાથે અન્ય સરકારી અને ખાનગી વીજ ઉત્પાદન કરતી કંપનીઓ પણ તેમના વપરાશને પહોંચી વળવા 38 મિલિયન ટન કોલસાની આયાત કરી શકે છે. આ રીતે, વર્ષ 2022 માં જ દેશમાં લગભગ 76 મિલિયન ટન કોલસાની આયાત કરવામાં આવશે, જે વૈશ્વિક બજારના દરે કરવામાં આવશે.

વીજળીના બિલમાં પ્રતિ યુનિટ 80 પૈસાનો વધારો થશે:
કોલસાની આયાતનો સીધો અર્થ એ છે કે, હવે વીજળીનું ઉત્પાદન મોંઘું થશે. દેખીતી રીતે, પાવર જનરેટ કરતી કંપનીઓ આ વધેલી કિંમત ગ્રાહકો પાસેથી વસૂલ કરશે અને તેમના વીજળી બીલ પર બોજ વધશે. આગામી દિવસોમાં વીજળીની પ્રતિ યુનિટ કિંમતમાં 50-80 પૈસાનો વધારો થવાનો અંદાજ લગાવવામાં આવી રહ્યો છે. આ અંગે બે સરકારી અધિકારીઓનું કહેવું છે કે, યુનિટ દીઠ ખર્ચમાં વધારો એ વાત પર નિર્ભર રહેશે કે પાવર સ્ટેશન દરિયાઈ બંદરથી કેટલા દૂર છે. મતલબ કે, બંદરોથી સ્ટેશન સુધી કોલસાના પરિવહનનો ખર્ચ પણ કંપનીઓના ખર્ચમાં વધારો કરશે.