હવે તો ગુજરાતીઓને સ્વેટર સાથે રેઇનકોટ પણ રાખવો પડશે તૈયાર- આજે રાજ્યના આ જીલ્લાઓમાં ખાબકશે વરસાદ

ગુજરાત(gujarat): હાલમાં શિયાળાની કડકડતી ઠંડીને બદલે વરસાદી માહોલ છવાયો હોય તેવું લાગી રહ્યું છે. અરબી સમુદ્ર(Arabian Sea)માં બનેલી લો પ્રેશર(Low pressure) સિસ્ટમ સાઉદી(Saudi) તરફ જઇ રહી છે. પવનની પેટર્ન દરિયાઇ થઇ જતાં સોમવારે વાદળછાયું વાતાવરણ રહ્યું હતું. જેના કારણે રાજ્યના અનેક વિસ્તારોમાં વરસાદી ઝાપટા પડ્યા હતા. હવામાન વિભાગ દ્વારા કરવામાં આવેલી આગાહી મુજબ દક્ષિણ ગુજરાત(South Gujarat)ના વાતાવરણમાં સતત પલટો જોવા મળી રહ્યો છે.

હવામાન વિભાગની આગાહી પ્રમાણે, આજે દક્ષિણ ગુજરાત અને સૌરાષ્ટ્રના કેટલાક વિસ્તારોમાં વરસાદ વરસવાની શક્યતા રહેલી છે. જ્યારે દક્ષિણ ગુજરાતની વાત કરીએ તો આજે સુરત, તાપી, ડાંગ, વલસાડ, નવસારી, દમણ અને દાદરાનગર હવેલીમાં કમોસમી વરસાદ વરસી વરસવાની આગાહી કરવામાં આવી છે.

આ ઉપરાંત, અન્ય વિસ્તારોમાં વાતાવરણ સુકું રહેવાની સાથે જ હવામાં ભેજ હોવાથી લઘુત્તમ તાપમાનમાં કોઈપણ પ્રકારનો ઘટાડો ન થવાની હવામાન વિભાગ દ્વારા આગાહી વ્યક્ત કરવામાં આવી છે. બે દિવસ બાદ રાજ્યમાં ઠંડી અનુભવાશે અને લઘુત્તમ તાપમાનમાં ત્રણથી પાંચ ડિગ્રી સુધીનો ઘડાટો નોંધાઈ શકે છે.

મળતી માહિતી મુજબ, સોમવારે પણ વલસાડના કપરાડામાં દોઢ ઈંચ અને ડાંગમાં 8 મિ.મિ. વરસાદ નોંધાયો હતો. આ સાથે સૌરાષ્ટ્રમાં અમરેલીના ખાંભા તાલુકાના લાસા ગામમાં ધોધમાર 2 ઈંચ વરસાદ વરસ્યો હોવાના અહેવાલ છે. આ ઉપરાંત, સૌરાષ્ટ્રમાં અન્યત્ર છૂટાછવાયા ઝાપટાં વરસ્યા હતા.