શા માટે ડોલર સામે રૂપિયો સતત ગબડી રહ્યો છે? જાણો શું છે તેની પાછળનું કારણ?

કોઈપણ દેશની આર્થિક સ્થિતિનું મુખ્ય સૂચક તેનું ચલણ છે. વૈશ્વિક સ્થિતિને કારણે છેલ્લા કેટલાક મહિનાઓથી યુએસ ડૉલર(USD)ની મજબૂતાઈ વધી રહી છે અને તેની સામે ભારતીય ચલણ(Indian currency) રૂપિયો ગગડી રહ્યો છે. સોમવારે સવારે શરૂઆતના કારોબારમાં ડોલર(Dollars) સામે રૂપિયો 78ના સૌથી નીચા સ્તરે ગયો હતો.

સોમવારે એટલે કે આજરોજ રૂપિયો પ્રતિ ડૉલર 78.14 પર ખૂલ્યો હતો, જે તેના શુક્રવારના બંધ કરતાં 0.38 ટકા નબળો છે. બ્લૂમબર્ગના અહેવાલ મુજબ, IFA ગ્લોબલે રવિવારે એક નોંધમાં જણાવ્યું હતું કે, “નબળું સ્થાનિક બજાર, ક્રૂડ ઓઇલની વધતી કિંમતો, ડોલરની મજબૂતી અને વિદેશી મૂડીનો પ્રવાહ, સ્થાનિક ચલણ આગામી સપ્તાહે દબાણ હેઠળ રહેશે.”

શુક્રવારે, ભારતીય ચલણ યુએસ ડોલર સામે 1 પૈસાના ઘટાડા સાથે 77.85 ના નવા સર્વકાલીન નીચા સ્તરે બંધ થયું. ટ્રેડિંગ સેશન દરમિયાન, સ્થાનિક ચલણ 77.93 ના જીવનકાળના નીચલા સ્તરને સ્પર્શ્યું હતું. સપ્તાહ દરમિયાન ગ્રીનબેક સામે રૂપિયો 21 પૈસા તૂટ્યો છે. જોકે, ડૉલર ઇન્ડેક્સ 0.20 ટકા વધીને 103.43 પર પહોંચ્યો હતો.

હવે આગળ ચલણની મુવમેન્ટ શું હશે?
વિશ્લેષકોએ રવિવારે કહ્યું હતું કે નબળા ફંડામેન્ટલ્સને કારણે આગામી કેટલાક સત્રોમાં રૂપિયો ડોલર સામે 78ની સપાટીને પાર કરી શકે છે. વિશ્લેષકોની વાત સાચી પડતાં એક દિવસ પણ ન લાગ્યો અને સોમવાર ખુલતાની સાથે જ રૂપિયો 78ની નીચે ગયો.