ઉજ્જૈન મહાકાલેશ્વરમાં ચઢ્યો મહાશિવરાત્રીનો રંગ! છેલ્લા એક મહિનાથી ધામ-ધૂમ ચાલી રહી છે તૈયારી... -જાણો આ વખતે શું છે ખાસ?

ઉજ્જૈન(Ujjain): ઉજ્જૈનના મહાકાલેશ્વર મંદિર (Mahakaleshwar temple)માં શિવ નવરાત્રી ઉત્સવ ખૂબ જ ધામધૂમથી ઉજવવામાં આવે છે. આ માટે ઘણા દિવસો અગાઉથી તૈયારીઓ શરૂ થઈ જાય છે. ભગવાન મહાકાલને 9 દિવસ સુધી વિવિધ સ્વરૂપોમાં શણગારવામાં આવે છે. આ માટે દૂર-દૂરથી સામગ્રી લાવવામાં આવે છે. આ દરમિયાન ભગવાન મહાકાલને ઉમા મહેશ, ઘાટટોપ, ચંદન શ્રૃંગાર, મન મહેશ, શિવ તાંડવ, છબિના વગેરે સ્વરૂપોમાં શણગારવામાં આવે છે.

એક મહિના પહેલાથી જ તૈયારીઓ ચાલી રહી છે:
મધ્યપ્રદેશના ઉજ્જૈનમાં સ્થિત મહાકાલેશ્વર મંદિરમાં મહાશિવરાત્રિ પહેલા શિવ નવરાત્રી ઉત્સવ ઉજવવામાં આવે છે. આ 9 દિવસોમાં ભગવાન મહાકાલને 9 અલગ-અલગ સ્વરૂપોમાં શણગારવામાં આવે છે. આ માટે મહાકાલ મંદિરના પંડિતો અને પુરોહિતો એક મહિના અગાઉથી તૈયારીઓ કરે છે. આ વિશેષ શણગાર માટે દૂર-દૂરથી સામગ્રી લાવવામાં આવે છે. શણગારમાં વપરાતી દરેક સામગ્રી કુદરતી જ હોય છે. શિવરાત્રી દરમિયાન મંદિરમાં ભોલેનાથના દર્શન કરવા માટે ભક્તોની ખુબ જ ભીડ હોય છે.

ભગવાન શિવને હળદર અને માતા પાર્વતીને મહેંદી:
મહાશિવરાત્રિ પહેલા, શિવ નવરાત્રિ દરમિયાન ભગવાન મહાકાલને ઘણી વિશેષ વસ્તુઓ અર્પણ કરવામાં આવે છે. આ દરમિયાન શિવલિંગ પર ચંદન અને ભાંગ ચઢાવવામાં આવે છે, જ્યારે જલાધારી પર હળદર ચઢાવવામાં આવે છે. તેની સાથે જ માતા પાર્વતીને મહેંદી લગાવવામાં આવે છે. આ પછી, મહાશિવરાત્રીના દિવસે ભગવાન શિવ અને માતા પાર્વતીનો વિવાહ ઉત્સવ ઉજવવામાં આવે છે. ભગવાન મહાકાલ વરરાજા બને છે. આ દિવસે દેશભરમાંથી ભક્તો મહાકાલ મંદિરના દર્શન કરવા પહોંચે છે. આ વર્ષે પણ મહાશિવરાત્રી નિમિત્તે મહાકાલ મંદિરમાં વિશેષ વ્યવસ્થા કરવામાં આવી રહી છે.