ગુજરાતના આ તાલુકામાં જાનૈયાઓથી છલોછલ ભરેલા ટ્રેકટરનો ભયંકર અક્સ્માત, 22 લોકો…

હાલ લગ્નગાળો ખુબ ચાલી રહ્યો છે. એવામાં એક જાન લઇ જતા જાનૈયાઓ સાથે ચોંકાવનાર ઘટના ઉભી થઇ છે. માલપુર નજીક એક જાનૈયાથી ભરેલા ટ્રેક્ટરને પૂરપાટ ઝડપે આવતા એક ટ્રકે ટક્કર મારી હતી, આ ટક્કરથી ટ્રેક્ટરમાં બેઠેલા જાનૈયાઓ માંથી 3 જેટલા લોકો ફંગોળાઈને પુલ પરથી નદીમાં ખાબક્યા હતા. સાથે-સાથે 22 જેટલા જાનૈયાઓને ઘણી-ખરી ઈજાઓ થઇ હતી તેથી તેમને નજીકની હોસ્પિટલમાં સારવાર માટે લઇ ગયા હતા.

મળેલી માહિતી જણાવે છે કે, જાનૈયાઓ એક ટ્રેક્ટરમાં ડચકા ગામથી મૈયાપુરમાં એક લગ્ન પ્રસંગમાં જઇ રહ્યા હતા. જ્યારે આ ટ્રેક્ટર અરવલ્લીના માલપુર નજીક આવેલા વાત્રક નદીના બ્રિજ પરથી પસાર થયું તે સમયે એક ટ્રકે જાનૈયાઓના ટ્રેક્ટરને જોરદાર ટક્કર મારી હતી. અને આ ઘટના સર્જાણી હતી.

ટ્રક અને ટ્રેકટર વચ્ચે થયેલી આ ટક્કર એટલી ભયંકર હતી કે, ટ્રેક્ટરની ટ્રોલીમાં બેઠેલા લોકો હવામાં ઉછળીને જમીન પર પટકાયા અને 3 જેટલા યુવકો નદીના બ્રિજ પરથી 50 ફૂટની ઊંચાઈથી ઉછળીને સીધા નદીના પાણીમાં પડ્યા હતા. ઘટનાને પગલે આસપાસના રાહદારીઓ જાનૈયાઓની મદદ માટે દોડી આવ્યા હતા. લોકોએ સમગ્ર ઘટનાની જાણ પોલીસને કરતા પોલીસ ઘટના સ્થળ પર પહોંચી હતી અને ઈજાગ્રસ્ત થયેલા 22 જેટલા જાનૈયાઓને સારવાર માટે હોસ્પિટલમાં ખસેડવાની તજવીજ શરૂ કરી હતી.