15 દિવસમાં રૂપિયા ડબલ થવાની લાલચે દેશના 50 લાખ લોકોએ જમા કરાવ્યા 250 કરોડ રૂપિયા- નીકળ્યો સૌથી મોટો ફ્રોડ

પોલીસે એક મોટી ઓનલાઈન છેતરપિંડીનો પર્દાફાશ કર્યો છે. 250 કરોડ રૂપિયાની છેતરપિંડીના કેસમાં નોઇડાથી એક આરોપીની ધરપકડ કરવામાં આવી છે. આશ્ચર્યજનક બાબત એ છે કે આટલી મોટી છેતરપિંડી માત્ર 4 મહિનાના ગાળામાં કરવામાં આવી હતી.

છેતરપિંડી ચીનની સ્ટાર્ટઅપ સ્કીમ હેઠળ બનાવવામાં આવેલી એક એપ દ્વારા કરવામાં આવી હતી. આ એપને દેશના લગભગ 50 લાખ લોકોએ ડાઉનલોડ કરી છે. આ એપ દ્વારા લોકોને 15 દિવસમાં તેમના નાણાં બમણા કરવાની લાલચ આપવામાં આવી હતી. આ લાલચમાં આવીને દેશના લાખો લોકોએ આ એપ્લીકેશન ડાઉનલોડ કરી હતી અને રૂપિયા નાખ્યા હતા. આ છેતરપિંડીમાં 15 દિવસમાં પૈસા બમણા કરવા માટે, પહેલા લોકોને આ એપ્લિકેશન ડાઉનલોડ કરાવવામાં આવી રહી હતી, ત્યારબાદ તેમને 15 દિવસમાં પૈસા બમણા કરવાની લાલચ આપવામાં આવતી હતી.

આ રીતે થયો કરોડોના કૌભાંડનો પર્દાફાશ
હરિદ્વારના રહેવાસીઓએ પોલીસને જાણકારી આપી હતી કે, “પાવર બેંક એપ” નામની એપ્લીકેશનથી ૧૫ દિવસમાં રૂપિયા ડબલ કરવા અમે આ એપમાં રૂપિયા જમા કરાવ્યા હતા. પહેલા ૯૩ હજાર અને બીજીવાર ૭૨ હજાર રૂપિયા જમા કરાવ્યા હતા. અને અમને કહેવામાં આવ્યું હતું કે, ૧૫ દિવસમાં જ રૂપિયા ડબલ થઈને તમારા ખાતામાં આવી જશે.

પરંતુ જ્યારે કેટલાય દિવસ વીત્યા બાદ રૂપિયા જમા નહી થતા પીડિતાએ પોલીસ સ્ટેશનમાં ફરિયાદ નોંધાવી હતી. જેના આધારે પોલીસે ગુનો નોંધી તપાસ શરૂ કરી. તપાસમાં જાણવા મળ્યું છે કે તમામ ભંડોળ જુદા જુદા ખાતામાં ટ્રાન્સફર કરવામાં આવ્યાં છે. આર્થિક વ્યવહારનો અભ્યાસ કરવામાં આવ્યો ત્યારે પોલીસના હાથમાં 250 કરોડની છેતરપિંડી સામે આવી. હતી એસએસપી અજયસિંહે જણાવ્યું હતું કે, પોલીસની તપાસમાં એક મોટી વાત સામે આવી છે કે, છેતરપિંડી કરનારાઓ ભારતીય ઉદ્યોગપતિને કમિશનની લાલચ આપીને એક એપ દ્વારા લોકોને લોન આપવાની વાત કરતા હતા.