50 વર્ષની ઉંમરે 8 બાળકોની માતાને ચડ્યો પ્રેમનો રંગ – પતિ અને બાળકોને નોધારા મૂકી પ્રેમી સાથે થઇ ફરાર

રાજસ્થાન(Rajasthan): કહેવાય છે કે પ્રેમની કોઈ ઉંમર હોતી નથી. પ્રેમ ગમે ત્યારે કોઈને પણ થઈ શકે છે. પરંતુ રાજસ્થાનના ભરતપુરથી આશિકીનો જે મામલો સામે આવ્યો છે તે ખૂબ જ ચોંકાવનારો છે. જ્યાં 8 બાળકોની માતાને 4 બાળકોના પિતા સાથે એટલો પ્રેમ થઈ ગયો કે, તે તેના પતિ અને બાળકોને છોડીને તેના પ્રેમી સાથે ભાગી ગઈ.

આશ્ચર્યની વાત એ છે કે, જ્યારે પોલીસે મહિલાની ધરપકડ કરી અને તેને કોર્ટમાં રજૂ કરી તો તેણે કહ્યું- “હું જઈશ અને મારા પ્રેમી સાથે રહેવા માંગુ છું. ત્યારબાદ કોર્ટે પણ મંજૂરી આપી હતી.” હકીકતમાં શનિવારે પોલીસે મહિલા અને તેના પ્રેમીને કોર્ટમાં રજૂ કર્યા હતા. આ દરમિયાન મહિલાનો પતિ તેના પરિવાર અને 8 બાળકો સાથે કોર્ટ પહોંચ્યો હતો. જ્યારે બાળકોએ માતાને ઘરે પરત આવવા વિનંતી કરી, ત્યારે પતિ પણ તેને ઘરે લઇ જવા માટે આજીજી કરતો રહ્યો હતો.

બધાએ મહિલાને સમજાવી, આઠ બાળકો પણ કોર્ટમાં રડી પડ્યા. પરંતુ મહિલા તેના પતિ અને બાળકો સાથે પરત જવા તૈયાર ન હતી. આઠ બાળકો ભીની આંખે ઘટનાક્રમ જોતા રહ્યા. જ્યારે કોર્ટે તેની મરજી પૂછી ત્યારે આખરે મહિલાએ જજને કહ્યું કે, તે પોતાની મરજીથી ગઈ છે અને તેના પ્રેમી સાથે રહેવા માંગે છે. કોર્ટે મહિલાને તેના પ્રેમી સાથે રહેવાની મંજૂરી આપી હતી. આ મામલો દિવસભર કોર્ટના કોરિડોરમાં ચર્ચાનો વિષય રહ્યો હતો.

જાણો શું છે સમગ્ર મામલો
આ મામલો ભરતપુરના કમાન પોલીસ સ્ટેશન વિસ્તારનો છે. જ્યાં નિમલા ગામના રહેવાસી ફકરુએ 12 એપ્રિલે પોલીસમાં ફરિયાદ નોંધાવી હતી કે, તેની પત્ની સુહાનીનું ગામનો જ સાહુન અપહરણ કરીને લઈ ગયો હતો. તે જ સમયે, પતિએ પછી ગામમાં પંચાયત બોલાવી હતી. જે દરમિયાન સાહુને પંચોની સામે કહ્યું કે, તે 23 એપ્રિલે ફકરૂની પત્નીને પરત કરશે. ફકરુ 23મીની રાહ જોતો હતો પરંતુ 23મી એપ્રિલે પત્ની ઘરે આવી ન હતી. ત્યાર બાદ યુવકે ફરીથી પંચાયત યોજી હતી. જ્યાં તેણે કહ્યું કે, તે પત્નીને પરત નહીં કરે. કારણ કે, તે તેને પ્રેમ કરે છે. જેથી પંચાયત પણ આ મામલે કંઈ કરી શકી નથી.