લોકડાઉનમાં મોટાભાગના લોકો બેચેન શા માટે છે ? શા માટે નાસીપાસ થઈ રહ્યા છે ?- વાંચો અદિતિ દવેની કલમે

મોટાભાગના માણસોને પોતાને જીવનમાં શું જોઈએ છે, પોતાને શું ગમે છે અને પોતે શું કરવા માંગે છે એની ખબર જ નથી. એટલે લોકડાઉન નહોતું અને સામાન્ય જીવન હતું ત્યારે આવા માણસો સતત રજાઓની રાહ જોતાં હતાં અને અત્યારે જ્યારે સંપૂર્ણ રજા છે ત્યારે શું કરવું અને સમય પસાર કેવી રીતે કરવો એ બાબતે નાસીપાસ થઈ રહ્યા છે કારણ કે એમને રજાઓ તો જોઈતી હતી પણ એ રજાઓ શા માટે જોઈતી હતી અને એ રજાઓમાં શું કરવું હતું એની ખબર જ નહોતી.

આની ચકાસણી કરવી હોય તો તમારી આસપાસ નજર ફેરવીને જોઈ શકો છો. તમારી આસપાસની જે વ્યક્તિઓને એ ખબર છે કે પોતાને શું ગમે છે, પોતાને શું જોઈએ છે અને પોતે શું કરવા માંગે છે એ વ્યક્તિઓ લોકડાઉન પહેલાં પણ મસ્ત બનીને જીવતી હતી અને લોકડાઉનના આ સમયમાં પણ મસ્ત બનીને જીવતી હશે અને જે વ્યક્તિઓને આ નહીં ખબર હોય એ વ્યક્તિઓ તમામ બાબતોમાં એકદમ Confused તેમજ Unclear હશે. એ અગાઉ પણ બેચેન રહેતી હશે અને અત્યારે પણ બેચેનીમાં હશે. Confused અને Unclear હોવાના કારણે વાંચવા બેસશે ત્યારે એમને મોબાઈલ લેવાનું મન થશે, મોબાઈલ લેશે તો ટીવી જોવાનું મન થશે, ટીવી ચાલુ કરશે તો ચેનલ ફેરવ્યા કરશે, કાંઈ નહીં ગમે તો અંતે સુઈ જશે. આ ચક્ર ચાલ્યાં જ કરશે અને બેચેની વધાર્યા જ કરશે.

એટલે નાસીપાસ અને બેચેન થયેલા મિત્રોને મારી અંગત સલાહ છે કે આ શ્રેષ્ઠ સમય છે પોતાને શોધી કાઢવાનો. વધુમાં વધુ સમય એકાંતમાં વિતાવો અને શોધી કાઢો કે તમારે જીવનમાં શું જોઈએ છે, તમને શું ગમે છે, તમે જીવનમાં શું કરવા માંગો છો. પછી જુઓ, આ લોકડાઉન તમારા માટે વરદાન સાબિત થશે.

જો કે, આ માનસિક કસરત જેટલી સહેલી લાગે છે એટલી સહેલી છે નહીં. તમારું મન સરળતાથી તમને આ કરવા નહીં દે કારણ કે એકાંત અને જાત સાથેનો સંવાદ એટલે વાસ્તવિકતાનો સામનો કરવો અને નાસીપાસ થતો માણસ વાસ્તવિકતાથી બહુ ડરતો હોય છે એટલે એ વાસ્તવિકતાથી ભાગવા માટે ગપ્પા મારે છે, ટીવી જુએ છે, વાંચે છે, સોશિયલ મીડિયામાં રચ્યોપચ્યો રહે છે. ટોઇલેટમાં પણ મોબાઈલ કે છાપું લઈને જાય છે. ઉંઘ ન આવે ત્યાં સુધી આ પ્રવૃત્તિઓ શરૂ રાખે છે કારણ કે ઉંઘ આવતાં પહેલાંની અમુક મિનિટો પણ એને જાત સાથે વાત કરતાં ડર લાગે છે.