સુરત/ SMCનું ડમ્પર કાળ બની ત્રાટક્યું: પુરપાટ ઝડપે આવી રહેલાં ડમ્પરે નોકરી પર જતી મહિલાને અડફેટે લેતાં કરુણ મોત- એકની એક દીકરી બની નિરાધાર

Surat Accident: રાજયમાં નવાર-નવાર અકસ્માતના કિસ્સાઓ સામે આવે છે જેમાં કેટલાં નિર્દોષ લોકો પોતાનો જીવ ગુમાવે છે . આજે સુરતમાંથી પણ એક ઘટના પ્રકાશવામાં આવી છે. કતારગામમાં(Surat Accident) મહાનગર પાલિકાના ડમ્પર ચાલકે એક મહિલાને અડફેટે લીધી. ઘટના બનતાં મોટી સંખ્યામાં લોકો એકઠા થઇ ગયા હતા અને ડમ્પર ચાલકને ઝડપી પાડ્યો હતો. આ સાથે જ ડ્રાઇવર દારૂના નશામાં હોવાની પણ આશંકા સેવવામાં આવી રહી છે. ઘટનાસ્થળે લોકોના ટોળેટોળા ઉમટી પડ્યા હતા ને પોલીસ સાથે બોલાચાલી કરી લોકો રોષે ભરાઈ હોબાળો કર્યો.

ડમ્પર ચાલક નશામાં હોવાની આશંકા
કતારગામમાં રહેતાં મૃતક મહિલા મનીષાબેન બારોટ દિવ્યાંગ છે. તેઓ આજે સવારે મોપેડ લઈને નોકરી પર જવા માટે નીકળ્યા હતાં. આ દરમિયાન પુરપાટ ઝડપે આવી રહેલા પાલિકાના ડમ્પર ચાલકે તેને અડફેટે લીધા અને તેઓ નીચે પટકાયા અને ત્યાર બાદ તેઓને કચડી નાખ્યા. આ ઘટના બનતાં જ થોડા સમયમાં મનીષા બને પોતાનો જીવ ગુમાવી દીધો. ઘટનાના પગલે ત્યાં લોકોનું ટોળું વળી ગયું અને ડમ્પર ચાલકને પકડી પાડી પોલીસને જાણ કરવામાં આવી .

અકસ્માતમાં માતાનું મોત થતાં 16 વર્ષની દીકરી બની નિરાધાર
કતારગામમાં આવેલા શક્તિ ડાયમંડ એપાર્ટમેન્ટમાં 45 વર્ષીય મનીષાબેન નિકુંજભાઈ બારોટ પરિવાર સાથે રહેતા હતા. મનીષાબેન બારોટના પતિનું દસ વર્ષ પહેલા અવસાન થઈ ચૂક્યું છે. જ્યારે તેમને એક 16 વર્ષની દીકરી છે. તેની દીકરીએ હાલ ધોરણ 10ની પરીક્ષા પૂર્ણ કરી હતી. મનીષાબેન રત્નકલાકાર તરીકે કામ કરીને પરિવારનું ગુજરાન ચલાવતા હતા.

એકની એક દીકરીએ નાનપણમાં જ પિતા ગુમાવ્યા બાદ હવે માતાને પણ ગુમાવી દેતા નિરાધાર બનતાં તેઓને આઘાત લાગી ગયો. અકસ્માત અંગે પોલીસને જાણ કરવામાં આવતા પોલીસ ઘટનાસ્થળે દોડી આવી હતી. ડમ્પરના ચાલકને પોલીસ હવાલે કરી દીધો હતો. જોકે લોકોના રોષના પગલે પોલીસની વાનને પણ ઘેરી લેવામાં આવી હતી. હાલ પોલીસ દ્વારા મહિલાના પરિવારજનોને જાણ કરવામાં આવી છે. મૃતદેહને પોસ્ટમોર્ટમ માટે ખસેડવામાં આવ્યો છે.