બાળકોને ઘરે એકલા મુકીને બહાર જતા વાલીઓ માટે લાલબત્તી સમાન કિસ્સો

સમગ્ર દેશમાં રેપની ઘટનાઓના વિરોધમાં ઉગ્ર દેખાવો થઇ રહ્યા છે. છતા બીજી તરફ મોટા પ્રમાણમાં રેપની ઘટનાઓ સામે આવી રહી છે. સમગ્ર ભારતમાં વાયુવેગે વધતી જતી બળાત્કારની ઘટનાના કારણે દેશ હવે એક શરમજનક સ્થિતિમાં મુકાયો છે. હવે તો બળાત્કારમાં નથી જોવાતી રાત કે નથી જોવાતો દિવસ. આવા બળાત્કારીઓ પોલીસના હાથે ઝડપાયા બાદ પણ કોર્ટમાં ચાલતી લાંબી પ્રક્રિયાના કારણે જામીન પર છૂટવામાં સફળતા મેળવી લે છે. એવી જ એક ઘટના ગુજરાતના અમદાવાદમાંથી સામે આવી છે.

ગુજરાતમાં આવેલ અમદાવાદના વેજલપુરમાં 15 વર્ષના યુવકે એક 13 વર્ષની સગીરા સાથે દુષ્કર્મ કર્યું હોવાની ઘટના સામે આવી છે. હાલ સમગ્ર મામલો પોલીસ સ્ટેશન પહોંચ્યો છે. પોલીસ આ ઘટનામાં ઉંડાણપૂર્વક જઈને તપાસ કરી રહી છે. અમદાવાદના વેજલપુરમાં આવેલ એક એપાર્ટમેન્ટમાં એક સગીરા રહેતી હતી, સગીરા જ્યારે ઘરે એકલી હતી.

ત્યારે તેના એપાર્ટમેન્ટમાં રહેતો અન્ય એક કિશોર તેના ઘરે ગયો હતો અને સગીરાને રમવાના બહાને ધાબે બોલાવીને ઉપર લઈ ગયો હતો. પરંતુ આ સગીર કિશોર રમવાની નહિ પણ કંઈક અલગ જ કાર્ય કરવાની અપેક્ષા મનમાં રાખીને આવ્યો હતો. જેથી સગીરાને ધાબા પર લઇ જઈને 15 વર્ષના આ સગીરે પહેલા 13 વર્ષની સગીરાને પોતે ખુબ જ પ્રેમ કરે છે તેવી વાત કરી હતી અને ત્યારબાદ સગીરા ઉપર દુષ્કર્મ આચર્યું હતું.

આ સમગ્ર ઘટના વિષે મળતી માહિતી અનુસાર, 13 વર્ષની સગીરા છેલ્લા 5 મહિનાથી જ અમદાવાદમાં તેના માતા પિતા પાસે આવી હતી. જોકે આ સમગ્ર મામલો ત્યારે સામે આવ્યો જ્યારે બંગલામાં કામ કરતા સગીરાના માતા-પિતા ઘરે કામ પરથી પરત આવતા પાડોશીઓએ સગીરા બપોરના બે કલાક બાજુમાં રહેતા સગીર કિશોર સાથે ધાબા પર ગઈ હોવાની જાણ કરી હતી. સગીરાની માતાએ શાંતિ પૂર્વક તેને સાથે વાત કરતા સગીરા ભાંગી પડી હતી અને તેણે માતાની સમગ્ર હકીકત જણાવી હતી.