ગીરનારની તળેટીમાં સમોસા વેચતા ધીરૂભાઈ કેવી રીતે બન્યા કરોડોના કારોબારી- જાણો રસપ્રદ વાતો

ગુજરાતના એક નાનાં એવાં ગામડામાંથી નીકળેલા ધીરૂભાઇ અંબાણી દીર્ઘદૃષ્ટા વિચારસરણીનું પરિણામ એટલે રિલાયન્સ ઇન્ડસ્ટ્રીઝ. ફક્ત ભારતમાં જ નહીં પણ વિશ્વની મોટી કંપનીઓમાં સામેલ છે.તેમની આ સફળતાની સફર આજે પણ આપણને પ્રેરણા આપે છે. આજે એટલે, કે 6 જુલાઈએ ધીરુભાઇ અંબાણીની પુણ્યતિથિ છે. જાણો, તેના જીવનના કેટલીક રસપ્રદ વાતો.

તેમનું આખું નામ ધીરજ લાલ હિરાચંદ અંબાણી છે. ધીરુભાઈનો જન્મ 28 ડિસેમ્બર 1932ના રોજ ચોરવાડ પાસેના એક નાનકડા ગામમાં થયો, જે ગુજરાતનાં જૂનાગઢ શહેર પાસે આવેલ છે. ધીરુભાઈના પિતા શાળાના એક શિક્ષક હતા. પાસે આવેલ ગિરનાર ટેકરી પર આવતા યાત્રાળુઓને સમોસા વેચીને ધીરૂભાઇએ પોતાનાં જીવનનાં પહેલા ધંધાની શરૂઆત કરી હતી.

તેમણે માત્ર 10 ધોરણ સુધી જ અભ્યાસ કર્યો હતો, અને સાબિત કરી બતાવ્યું હતું, કે ટોચના ઉદ્યોગસાહસિક બનવા માટે કોઈ મોટી મેનેજમેન્ટની ડિગ્રી લેવી જરૂરી નથી. તેમની બુદ્ધિ પ્રતિભાની આગળ ભલભલા પાણી ભરે છે. 1955 માં ફક્ત 16 વર્ષની વયે સૌપ્રથમ વખત વિદેશ ગયા હતાં. તે પોતાના ભાઈ રમણીકલાલની સાથે કામ કરવા માટે યમનના શહેર અદનમાં ગયાં હતા.

તેમણે પેટ્રોલ પંપ પર સહાયક તરીકેની પહેલી નોકરી કરી હતી અને તેનો પગાર મહિને ફક્ત 300 રૂપિયાનો જ હતો. થોડા સમય બાદ તે ભારત પાછા આવ્યા અને ગિરનાર શિખર પર યાત્રાળુઓને સમોસા વેચવાની શરૂઆત કરી. 5 વર્ષમાં જ તેમણે 1960માં તેમના એક પિતરાઇ ભાઇ ચંપકલાલ દમાની સાથે રિલાયન્સ કમર્શિયલ કોર્પોરેશનની સ્થાપના કરી નાંખી હતી. તેમની પહેલી ઓફિસ મુંબઈના મસ્જિદ બંદર વિસ્તારમાં નરસિનાથન સ્ટ્રીટમાં 350 ચોરસફૂટના રૂમમાં આવેલ હતી. જેમાં ફક્ત 2 ટેબલ, 3 ખુરશીઓ અને ટેલિફોન હતો.