ટ્રક અને છકડા વચ્ચે સર્જાયો કાળમુખો અકસ્માત- મુસાફરો ભરેલી રિક્ષા કચડાઈ જતા એક મહિલાનું કરુણ મોત

ગુજરાત(Gujarat): ભુજ(Bhuj)ના ઔધોગિક શહેર ગાંધીધામ(Gandhidham)માં આજે સોમવારના રોજ સવારે 11.30 વાગ્યાની અરસે ઝોન તરફ જઈ રહેલી એક ટ્રક છકડો રિક્ષા ઉપર ચડી જતા ભયંકર અકસ્માત(Accident) સર્જાઈ જવા પામ્યો હતો. અકસ્માતમાં 65 વર્ષીય ગંગાબેન કરશનભાઇ શ્રીમાળી નામની મહિલાનું ઘટનાસ્થળે જ કરુણ મોત નીપજ્યું હતું.

જ્યારે 40 વર્ષના રીક્ષા ચાલક અનવર આમદ કુંભાર ગંભીર રીતે ઈજાગ્રસ્ત થતા ખાનગી હોસ્પિટલમાં સારવાર અર્થે દાખલ કરવામાં આવ્યો છે. અકસ્માતમાં ઘાયલ લોકોને ઉપસ્થિત લોકોએ જેસીબીની મદદ વડે બહાર લાવી 108 એમબ્યુલન્સ મારફતે ઈલાજ માટે હોસ્પિટલમાં ખસેડવામાં આવ્યા છે.

જો કે રિક્ષામાં કુલ કેટલા લોકો સવાર હતા તે અંગે ગાંધીધામ બી ડિવિઝન પોલીસ દ્વારા તપાસ હાથ ધરવામાં આવી છે. શહેરના કાર્ગો માર્ગ પર આવેલી બાપા સીતારામ મઢી નજીક બનેલા આ અકસ્માતના કારણે લોકોની ભારે ભીડના દ્રશ્યો જોવા મળ્યા હતા.