તાલીબાન સામે વિરોધમાં પડી અફઘાની મહિલાઓ: રસ્તા પર ઉતરીને માંગી રહી છે પોતાના અધિકારો

અફઘાનિસ્તાનના પશ્ચિમ હેરત પ્રાંતમાં ગવર્નરની ઓફિસની બહાર ગુરુવારે લગભગ 50 કરતા પણ વધારે મહિલાઓએ વિરોધ પ્રદર્શન કર્યું હતું. તેમની માંગ છે કે નવી સરકારમાં મહિલા અધિકારોના રક્ષણને પ્રાધાન્ય આપવું જોઈએ. રેલીના આયોજક ફ્રિબા કાબરજાનીએ જણાવ્યું હતું કે, નવી સરકારમાં મહિલાઓને રાજકીય ભાગીદારી મળવી જોઈએ. જેમાં ‘લોયા જિરગા’ અને મંત્રીમંડળનો સમાવેશ થાય છે.

તેમણે કહ્યું કે અફઘાન મહિલાઓએ છેલ્લા 20 વર્ષોમાં આજે જે છે તે હાંસલ કરવા માટે ઘણા બલિદાન આપ્યા છે. કાબરજાનીએ કહ્યું, ‘અમે ઇચ્છીએ છીએ કે દુનિયા આપણું સાંભળે અને અમે અમારા અધિકારોની રક્ષા કરવા માંગીએ છીએ.’ કાબરજાનીએ કહ્યું કે, કેટલાક સ્થાનિક પરિવારોએ અન્ય મહિલાઓને રેલીમાં આવવા દીધી ન હતી.

તે જ સમયે, તાલિબાનોએ દેશની સત્તા સંભાળ્યા પછી, આ મહિલાઓ તેમની સલામતીને લઈને પણ ચિંતિત છે. વિરોધમાં જોડાયેલી અન્ય એક મહિલા મરિયમ અબ્રામ્સે કહ્યું કે, તાલિબાન ટીવી પર ઘણાં ભાષણો આપી રહ્યા છે પરંતુ જાહેરમાં તેઓ સત્તાનો દુરુપયોગ કરી રહ્યા છે. મહિલાઓએ કહ્યું કે, ‘અમે તેમને ફરી મહિલાઓને મારતા જોયા છે.’

વિરોધ કરી રહેલી મહિલાઓએ કહ્યું કે, તેઓ ફરીથી બુરખો પહેરવા માટે તૈયાર છે, પરંતુ તે ત્યારે જ કરશે જ્યારે તેમની દીકરીઓને તાલિબાનના શાસનમાં શાળાએ જવાની મંજૂરી આપવામાં આવે. 50 જેટલી મહિલાઓએ ‘શિક્ષણ, કામ અને સુરક્ષા અમારો અધિકાર છે’ ના નારા લગાવ્યા હતા.