સુરતમાં પૈસાદાર યુવતીઓને ખુશ રાખવાની લાલચ આપી રૂપિયા પડાવતા યુવક-યુવતી ઝડપાયા

સુરત(ગુજરાત): તાજેતરમાં રાજ્યમાંથી એવા ઘણા કિસ્સા સામે આવી રહ્યા છે જેમાં છેતરપીંડી કરીને લાખો રૂપિયા પડાવી લેવામાં આવતા હોય છે. આ દરમિયાન, સુરતમાં એન.આર.આઈ યુવતીઓ સાથે મુલાકાત કરાવી તેઓ સાથે બે કલાક વાત કરવા અને તેમને ખુશ રાખવાથી રૂપિયા 25 હજારથી 30 હજાર રૂપિયા મળશે તેવી લોભામણી લાલચ આપી અલગ અલગ ચાર્જીસના નામે યુવક પાસેથી રૂપિયા પડાવી લઈ છેતરપિંડી કરનાર મહિલા સહિત બે આરોપીઓને સુરત સાયબર ક્રાઇમની ટીમ દ્વારા મહારાષ્ટ્ર ખાતેથી ઝડપી પાડી તપાસ શરૂ કરવામાં આવી છે.

જાણવા મળ્યું છે કે, સુરતમાં એક યુવક જાહેર ખબરના માધ્યમથી છેતરપિંડીનો ભોગ બન્યો છે. જોકે, છેતરપિંડી કરનારા ઠગબાજોને પોલીસ દ્વારા મહારાષ્ટ્ર ખાતેથી ઝડપી પાડવામાં આવ્યા છે. ઘટનાની વિગત વાત કરીએ તો સુરતના અલગ-અલગ જાહેર છાપાઓમાં આવતી જાહેર ખબર વાંચી યુવક ભરમાયો હતો. સુરતના યુવકે એક છાપામાં જાહેર ખબર જોઈ હતી. જેમાં બ્યુટી પાર્લર નામથી જાહેરાત અજાણ્યા વ્યક્તિ દ્વારા આપવામાં આવી હતી. જે જાહેરાતમાં યુવતીઓ સાથે મિત્રતા કરાવવા, ચેટિંગ કરવા તેમજ રૂબરૂ મુલાકાત કરવાથી મહિને 25 થી 30 હજાર રૂપિયા મળશે તેવી લોભામણી અને લલચામણી જાહેર ખબર આપવામાં આવી હતી.

મળતી માહિતી મુજબ, લોભામણી જાહેરાતમાં આપવામાં આવેલા મોબાઇલ નંબરના આધારે બાબુભાઈ અને સોનિયા નામની યુવતીનો સંપર્ક કરવામાં આવ્યો હતો. બંનેએ એક યુવકને પોતાની વાતોમાં અને વિશ્વાસમાં લઇ એન.આર.આઈ યુવતીઓ સાથે મુલાકાત કરાવી તેઓ સાથે બે કલાક વાત કરવા અને તેમને ખુશ રાખવાથી મહિને 25000 રૂપિયા મળશે તેવી લલચામણી વાતોમાં ફોસલાવ્યો હતો.

જોકે, તે પહેલા અલગ-અલગ ચાર્જીસના નામે યુવક પાસેથી ગુગલ પે એકાઉન્ટ પર રૂપિયા 69 હજાર 410 રૂપિયા જેટલી રકમ બંને ઠગબાજો દ્વારા પડાવી લેવામાં આવી હતી. રૂપિયા પડાવી લીધા હોવા છતાં પણ સુરતના યુવકને એન.આર.આઈ યુવતીઓ સાથે મુલાકાત પણ કરાવવામાં આવી ન હતી કે ટેલિફોનિક સંપર્ક પણ કરાવ્યો ન હતો. જ્યાં પોતે છેતરપિંડીનો ભોગ બન્યા હોવાનો અહેસાસ થતા યુવકે આ અંગેની ફરિયાદ સુરત સાયબર ક્રાઇમ પોલીસ મથકમાં નોંધાવવામાં આવી હતી.