મહિલા PSI પર દુષ્કર્મ આચરનાર નરાધમની ધરપકડ- શરુ થયો તપાસનો ધમધમાટ

રાજકોટ(ગુજરાત): તાજેતરમાં ભાવનગર(Bhavnagar)ની એક મહિલા PSIએ કચ્છ(Kutch)ના ભુજ(Bhuj)માં તૈનાત એક પરિણીત પોલીસ સબ ઈન્સ્પેક્ટર(PSI) પર બળાત્કારનો આરોપ લગાવ્યો હોવાના સમાચાર સામે આવ્યા છે. ફરિયાદ નોંધ્યા બાદ પોલીસ દ્વારા PSI રાકેશ કટારા(Rakesh Katara)ની ધરપકડ કરવામાં આવી હતી. જેઓ હાલ ભુજ પોલીસ હેડક્વાર્ટર ખાતે તૈનાત છે. હાલ ગુજરાત પોલીસ(Gujarat Police)ને શર્મસાર કરતી ઘટનાના લઈને ભાવનગર પોલીસ(Bhavnagar Police) બેડામાં ખળભળાટ મચી જવા પામ્યો છે.

આ અંગે પોલીસના જણાવ્યા મુજબ, મહિલા PSIએ બળાત્કારની ફરિયાદ નોંધાવ્યા બાદ ભાવનગર પોલીસ દ્વારા ભુજમાં તેમના સમકક્ષોને જાણ કરવામાં આવી હતી. ત્યારબાદ તેમણે કટારાની અટકાયત કરી હતી અને ગુરુવારે ભાવનગર બી ડિવિઝન પોલીસ દ્વારા તેમની વિધિવત ધરપકડ કરવામાં આવી હતી અને ભૂજથી ભાવનગર લવાયા હતા.

મહિલા PSIએ પોતાની ફરિયાદમાં જણાવતા કહ્યું છે કે, તે અને કટારાનો ભાઈ પોલીસ ટ્રેનિંગ દરમિયાન સાથે હતા. મહિલા PSI કટારાના ભાઈ દ્વારા જ કટારાના સંપર્કમાં આવી હતી. પીડિતાએ કટારા પર લગ્નનું વચન આપીને 2019થી અલગ-અલગ જગ્યાએ લઈ જઈ અનેક વખત બળાત્કાર ગુજાર્યાનો પણ આરોપ લગાવ્યો હોવાનું સામે આવ્યું છે.

પ્રાપ્ત માહિતી અનુસાર, ભાવનગરના મહિલા પીએસઆઈ અને કચ્છ-ભુજ જિલ્લાના પીએસઆઈ કટારા બંનેને દાહોદ જિલ્લા અને એક જ તાલુકાના હોવાથી પરિચયમાં આવ્યા હતા. ફરિયાદમાં એવો ઉલ્લેખ કરવામાં આવ્યો છે કે, કટારાએ મિત્રતાનો લાભ લઈ મહિલા અધિકારીને પ્રેમજાળમાં ફસાવી તેની પત્નીને છૂટાછેડા આપવા જણાવ્યું હતું.