મહારાષ્ટ્ર બાદ કોંગ્રેસની હવે ગુજરાત પર નજર, બધી બાજુથી ઘેરીને ખદેડશે ભાજપને એવી રણનીતિ

ભાજપે 2014 ખુબ સારી રીતે સરકાર બનાવી હતી. આખું ભારત મોદીનો જયજયકાર કરી રહ્યું હતું. પણ તેના કામોથી દરેક રાજ્ય માંથી ધીમે ધીમે વળતા પાણી ચાલુ થયા હોય તેવું લાગી રહ્યું છે. ભારતમાં કોંગ્રેસનું અસ્તિત્વ મિટાવવાના સપનાં જોનાર ભાજપને પણ હવે સ્થાનિક રાજ્યોમાં અસ્તિત્વ સાબિત કરવા માટે પણ ફાંફા પડી રહયાં છે. મોદી ચમત્કાર પર વિશ્વાસ રાખી 2019 માં તો પ્રચંડ બહુમતી સાથે ભાજપની સરકાર આવી ગઈ પણ જો આપણે રાજ્યો પર નજર નાખીએ તો માલુમ પડે કે અહિયાં ભાજપને કેવી પરિસ્થિતિ છે ?

ભારતીય જનતા પાર્ટીએ 2018 થી લઈને અત્યાર સુધીમાં ત્રણ મોટા રાજ્યો ગુમાવી દીધા છે. રાજસ્થાન અને મધ્યપ્રદેશમાં એક સાથે ચૂંટણી હતી. જેમાં નજીવી સરસાઈ મેળવી કોંગ્રેસ પાર્ટી ભૂસકો મારી ગઈ અને સત્તાના સિંહાસન પર વિરાજમાન થઈ ગઈ. જ્યારે આ વર્ષે થયેલી મહારાષ્ટ્રની ચૂંટણીમાં શિવસેનાએ ભાજપને મુખ્યપ્રધાન રૂપી ફૂંફાડો મારી તમામ સંબંધો કિનારે કરી નાંખ્યા. જેથી ગુજરાતના ત્રણ પાડોશી રાજ્યોમાં હવે કોંગ્રેસની સરકાર બની જશે તેવી પૂરી સંભાવના છે. આ સ્થિતિ એવી જ છે કે જ્યારે નરેન્દ્ર મોદી તત્કાલીન ગુજરાતના મુખ્યમંત્રી બન્યા હતા ત્યારે ગુજરાતના પાડોશી રાજ્યોમાં કોંગ્રેસનો દબદબો હતો જે ધીમે ધીમે ઘટ્યો અને હવે ફરી એક વખત વધી રહ્યો છે. જેમાંથી ગુજરાતે પણ વહેલી તકે બોધપાઠ લેવાની જરૂર છે.

રાહુલ ગાંધી અને સોનિયા ગાંધી હવે ગુજરાત તરફ ધ્યાન દોરશે. ગુજરાતમાં કોંગ્રેસની મજબૂત સ્થિતિ નથી પણ સરકાર સામે આવાનો માહોલ છે. ગુજરાતની જનતા પાસે મજબૂત વિકલ્પનો અભાવ છે. કોંગ્રેસ જનતાની નારાજગીનો ફાયદો ઉઠાવવા નવી રણનીતિ ઘડી રહ્યું છે. કોંગ્રેસ કોઈ પણ ભોગે ગુજરાતમાં મજબૂત થવા માટે પ્રયાસો કરી રહ્યું છે. મહારાષ્ટ્રમાં શિવસેના સરકાર બની તો ગુજરાતને 3 બાજુથી ઘેરવાની રણનીતી બનશે એ હવે ફાયનલ થઈ ગયું છે. કોંગ્રેસને હવે સ્થાનિક નેતાઓ પર પણ ભરોસો રહ્યો નથી. જેથી રાજસ્થાન, એમપી અને મહારાષ્ટ્રના કદાવર નેતાઓના આગેવાની હેઠળ ભાજપને પછાડવા માટે નવી રણનીતિ ઘડાય તો પણ નવાઈ નહીં.