પ્રેમી પંખીડાને જોતા જ ફાટ્યો બાટલો અને આડેધડ મારવા લાગ્યો છરીના ઘા- હચાવનારી છે ગાંધીનગરની આ ઘટના

ગાંધીનગર(ગુજરાત): હાલમાં ગાંધીનગર(Gandhinagar)માંથી એક ચકચાર મચાવતો કિસ્સો સામે આવ્યો છે. જેમાં ઝૂંડાલ(Zundal) નર્મદા કેનાલ(Narmada Canal) નજીક એક્ટિવા(Activa) પાર્ક કરીને અમદાવાદ(Ahmedabad)ના પ્રેમી પંખીડા વાતો કરી રહ્યા હતા. આ દરમિયાન, બાઈક લઈને આવેલા અજાણ્યા શખ્સે પ્રેમી પંખીડા સાથે કેનાલ પાસે બેસવા બાબતે માથાકૂટ કરી હતી. બાદમાં આવેશમાં આવી જઈ છરી વડે પ્રેમના પેટના ભાગે ઉપરા છાપરી ઘા ઝીંકી દીધા હતા.

ત્યારે પ્રેમીને બચાવવા વચ્ચે પડેલી પ્રેમિકાને પણ આ હુમલામાં ઈજાઓ પહોંચી હતી. આ હુકમમાં ગંભીર રીતે ઘાયલ પ્રેમીને પેટ, લીવર અને છાતીમાં ગંભીર ઈજાઓ થતાં અમદાવાદ સિવિલ હોસ્પિટલમાં દાખલ કરવામાં આવ્યો છે. જે અંગે અડાલજ પોલીસ દ્વારા હત્યાનો ગુનો દાખલ કરી કાયદેસરની કાર્યવાહી હાથ ધરવામાં આવી છે.

મળતી માહિતી મુજબ, ગઈકાલે અડાલજના ઝુંડાલ નર્મદા કેનાલ નજીક બેઠેલા પ્રેમી પંખીડા પર છરી વડે ઘાતકી હુમલો કરી પ્રેમીની હત્યાનાં પ્રયાસનો ગુનો દાખલ કરવામાં આવ્યો છે. અમદાવાદ જૂના વાડજના સાબરનગર ખાતે રહેતી 21 વર્ષીય છાયા અમરસિંહ પારગીએ નોંધાવેલી ફરિયાદ અનુસર, ગઈકાલે તે બપોરના સમયે અમદાવાદ ઈન્કમટેક્સ ખાતે બેંક ઓફિસરનું ઇન્ટરવ્યૂ આપવા માટે ગઈ હતી. જે ઇન્ટરવ્યૂ પૂર્ણ થતા સાડા ચાર વાગ્યાના અરસામાં સાબરનગરમાં જ રહેતો તેનો પ્રેમી અજય પ્રવીણભાઈ સાગર એક્ટિવા લઈને તેને લેવા આવ્યો હતો.

ત્યારબાદ બંને જણા એક્ટિવા પર ઝુંડાલ નર્મદા કેનાલ તરફ આવ્યા હતા. જ્યાં કેનાલના બ્રિજથી જમણી બાજુ વળાંક લઈ અંદરની તરફ જઈને કેનાલ પાસેના રોડ પર ઉભા રહ્યા હતા. આ દરમિયાન, અજય એક્ટિવા પર બેઠો હતો અને તેની પાસે છાયા ઉભી રહીને વાતો કરતી હતી. સાડા પાંચ વાગ્યાના અરસામાં અહીંથી એક 20 થી 22 વર્ષીય શખ્સ બાઈક લઈને નીકળ્યો હતો અને થોડેક આગળ બાઈક પાર્ક કરી બન્નેની પાસે આવ્યો હતો.