સાઈબર ક્રાઇમે ઓનલાઇન શોપિંગ કૌભાંડનો કર્યો પર્દાફાશ – આરોપીઓ આવી રીતે કરતા હતા છેતરપીંડી

અમદાવાદ(ગુજરાત): આજકાલ ઓનલાઈનનો વ્યવસાય મોટા પ્રમાણમાં ચાલી રહ્યો છે. આ દરમિયાન, અમદાવાદ(Ahmedabad)માં સાઈબર ક્રાઈમ બ્રાન્ચ(Cyber Crime Branch) દ્વારા ઓનલાઇન શોપિંગ(Online shopping) કૌભાંડનો પર્દાફાશ કરી લાખો રૂપિયાનો મુદ્દામાલ કબ્જે કરવામાં આવ્યો હોવાનું સામે આવ્યું છે. જાણવા મળ્યું છે કે, સાયબર ક્રાઇમની ટીમે 2 આરોપીઓની ધરપકડ કરી લાખો લોકોના થયેલા ડેટા લીક(Data leak) કૌભાંડનો પર્દાફાશ કર્યો છે. બંને આરોપીઓ ઓનલાઇન શોપિંગ કરનાર ગ્રાહકોના ઓર્ડર બારોબાર મેળવી લેતા હતા. સાયબર ક્રાઇમ દ્વારા 20 લાખ યુઝર(20 lakh users)ના ડેટા લીક થયા હોવાની આશંકા વ્યક્ત કરવામાં આવી છે.

પોલીસ ગિરફતમાં ઉભેલા આરોપીઓનું નામ ગૌતમ ઉર્ફે પૃથ્વી બારડ અને નિલેશ બાબરીયા છે. બંને યુવકોની છેતરપીંડી કરતા પહેલા પબજી ગેમ રમતી વખતે મુલાકાત થઈ હતી. આમ તો બંને આરોપીઓએ કઈ ખાસ અભ્યાસ કર્યો નથી છતાં તે માસ્ટર માઈન્ડ છે અને ટેલિગ્રામમાંથી તમામ લોકોના ડેટા મેળવી એકાઉન્ટ હેક કરી છેતરપીંડી કરતા હોવાનું સામે આવ્યું છે. પકડાયેલ બન્ને આરોપીઓ ફ્લિપકાર્ટ, મંત્રા, બ્રાન્ડ ફેક્ટરી, ટાટા ક્લિક જેવી બીજી વેબસાઈટના ગ્રાહકોના ઑનલાઇન ડિલિવરી કરેલા ઓર્ડરને હેક કરીને સરનામું બદલી કોઈપણ રીતે મેળવી લેતા હતા. મળતી માહિતી મુજબ, બનેં આરોપીઓએ ટેલીગ્રામમાંથી આ તમામ ડેટા મેળવી ભોગ બનનારના યુઝર દ્વારા તેને હેક કરી આ સમગ્ર કૌભાડ આચર્યું હોવાનું સામે આવ્યું છે.

આરોપીઓ હેકિંગ કરવા માટે પ્રોક્ષી આઇ.પી એડ્રેસનો ઉપયોગ કરતા હોવાનું પોલીસ તપાસમાં સામે આવ્યું છે. આ ઉપરાંત, આરોપીઓએ OTT પ્લેટફોર્મનાં પણ ડેટા હેક કરી વગર ખર્ચે ઓનલાઈન પ્લેટફોર્મનો લાભ લેતા હતા. તપાસમાં સામે આવ્યું છે કે, આરોપીઓ ટેલીગ્રામ એપ્લિકેશન પરથી એક હેકિંગ ટૂલ ડાઉનલોડ કરતા હતા અને તેના આધારે ગ્રાહકોના આઇ.પી બ્લોક ના થાય તેનું ધ્યાન રાખીને કૌભાંડ કરતા હતા. સાયબર ક્રાઇમ દ્વારા દેશ ભરમાં 20 લાખ યુઝરના ડેટા લીક થયા હોવાનું જાણવા મળ્યું છે.