November 04, 2024
દેશભરમાં કોરોના(Corona) વાયરસના ઝડપથી વધી રહેલા કેસ વચ્ચે દિલ્હી(Delhi)માં સંક્રમણની ગતિને રોકવા માટે એક મહત્વપૂર્ણ નિર્ણય લેવામાં આવ્યો છે. રાષ્ટ્રીય રાજધાનીમાં ઝડપથી વધી રહેલા કેસોને નિયંત્રિત કરવાના પ્રયાસો ચાલુ છે. સંક્રમણ બેકાબૂ ગતિને લઈને આજે યોજાયેલી ડીડીએમએની બેઠકમાં દિલ્હીમાં ફરી એકવાર વીકએન્ડ કર્ફ્યુ(Weekend curfew) લાદવાનો નિર્ણય લેવામાં આવ્યો છે.
સરકારી કચેરીઓમાં 50 ટકા ક્ષમતાથી કામ થશે:
50% કર્મચારીઓને ખાનગી અને સરકારી કચેરીઓમાં આવવાની મંજૂરી આપવામાં આવી છે. તેવી જ રીતે, દિલ્હીમાં આવશ્યક સેવાઓ ચાલુ રાખવામાં આવશે. આ બેઠકની માર્ગદર્શિકા અંગે ટૂંક સમયમાં સત્તાવાર આદેશ અને સૂચના જારી કરવામાં આવશે.
ડેપ્યુટી સીએમનું નિવેદન:
દિલ્હીમાં કોરોનાની ચિંતાજનક સ્થિતિ વચ્ચે નાયબ મુખ્યમંત્રી મનીષ સિસોદિયાએ પ્રેસ કોન્ફરન્સ કરીને મહત્વપૂર્ણ માહિતી શેર કરી છે. સિસોદિયાએ કહ્યું કે દિલ્હી સહિત સમગ્ર દેશમાં ઓમિક્રોનનો ગ્રાફ સતત વધી રહ્યો છે. જોકે ઓમિક્રોન વધુ નુકસાન નથી કરી રહ્યું. હાલમાં સમગ્ર વિશ્વમાં જેવો ટ્રેન્ડ છે તે જ ટ્રેન્ડ દિલ્હીમાં પણ દેખાઈ રહ્યો છે. દિલ્હીની હોસ્પિટલમાં 350 લોકો દાખલ છે. જેમાં 124 ઓક્સિજન સપોર્ટ પર છે. વેન્ટિલેટર પર 7 લોકો છે.
Trending News
નાયબ મુખ્યમંત્રીએ કહ્યું કે આપણે બધાએ કોવિડથી દરેક કિંમતે દૂર રહેવું જરૂરી છે. તેથી, આજે મળેલી ડીડીએમએની બેઠકમાં લેવાયેલા નિર્ણયો વિશે શક્ય તેટલા વધુ લોકો માહિતગાર હોવા જોઈએ.
ડીડીએમએનો નિર્ણય:
દિલ્હીમાં શનિવાર અને રવિવારે કર્ફ્યુ રહેશે.
દિલ્હીની સરકારી ઓફિસોમાં ઘરેથી કામ ચાલુ રહેશે.
આવશ્યક સેવાઓની કચેરીઓ ચાલુ રહેશે.
ખાનગી ઓફિસો 50 ટકા ક્ષમતાથી ચાલશે. બાકીના ઘરેથી અથવા ઓનલાઈન કામ કરશે.
AIIMS એ રજાઓ રદ કરી:
કોરોનાના વધતા જતા કેસોને ધ્યાનમાં રાખીને દિલ્હી AIIMS એ તેની શિયાળાની રજાઓ એટલે કે બાકીની રજાઓ (5 થી 10 જાન્યુઆરી સુધી) રદ કરી દીધી છે. AIIMSએ રજા પર ગયેલા કર્મચારીઓને વહેલામાં વહેલી તકે ફરજ પર પાછા ફરવા કહ્યું છે. ખરેખર અહીં હવે સકારાત્મકતા દર 6.46% પર પહોંચી ગયો છે. જો કે આ દરમિયાન 1509 દર્દીઓ સાજા પણ થયા છે.
આ રાજ્યોમાં પણ લાગુ થઇ શકે છે કડક નિયમો:
બીજી બાજુ જોવામાં આવે તો મુંબઈમાં પણ લૉકડાઉનને લઈને મેયરે સ્પષ્ટ કહી દીધું છે કે, જો દૈનિક કેસનો આંકડો 20 હજારને પાર થઈ જશે તો અમે લૉકડાઉન લગાવી દઇશું. સાથે જ અન્ય કેટલાય રાજ્યોમાં કોરોનાના કેસોમાં વધારો થશે તો નાઈટ કર્ફ્યું અને અન્ય કેટલાય નિયમોમાં સરકાર કડક પગલા ભરી શકે છે. હાલમાં કોરોનાની સાથે સાથે ઓમિક્રોને પણ સમગ્ર દેશમાં હાહાકાર મચાવ્યો છે.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.