કાપોદ્રામાં ખેલાયો ખૂની ખેલ, મોડી રાત્રે અજાણ્યા શખ્સો માથાભારે વ્યકિત પર લાકડા અને તલવાર વડે તૂટી પડ્યા

સુરત(Surat): શહેરના કાપોદ્રા(Kapodra) વિસ્તારમાં મોડી રાત્રે માથાભારે દિલીપ દેવીપૂજક(Dilip Devipujak)ની લાકડાના ફટકા અને તીક્ષ્ણ હથિયાર વડે હુમલો કરી કરુણ હત્યા કરી નાખવામાં આવતા સમગ્ર વિસ્તારમાં ચકચાર મચી જવા પામી હતી. હાલમાં અ ઘટનાને લઈને પોલીસે વધુ તપાસ હાથ કરી છે.

આ ઘટના અંગેની જાણવા મળતી પ્રથમ માહિતી મુજબ માથાભારે પ્રકૃતિ ધરાવતો દિલીપ દેવીપૂજક બુધવારના રોજ રાત્રે 10:30 વાગ્યાના અરસામાં કાપોદ્રા સ્નેહમુદ્રા સોસાયટી પાસે આવેલા સુરત મહાનગરપાલિકાના પાર્કિંગ નજીક પોતાના મિત્રો સાથે બેઠો હતો, ત્યારે જ અંદાજે પાંચેક જેટલા અજાણ્યા શખ્સો આવ્યા અને તેની પર લાકડાના ફટકા અને તિક્ષ્ણ હથિયાર વડે હુમલો કરવા લાગ્યા હતા જેને કારણે દિલીપ ઘટના સ્થળ પર જ ફસડાઈ ગયો હતો.

આ ઘટના અંગેની જાણ થતાં સ્થાનિક યુવાનો ઘટના સ્થળ પર દોડી આવ્યા હતા અને દિલીપ દેવીપૂજકને સારવાર માટે કિરણ હોસ્પિટલમાં સારવાર અર્થે લઈ ગયા હતા. જો કે, સારવાર મળે તે પહેલા જ દિલીપ દેવીપૂજકનું મૃત્યુ થઇ ગયું હતું. આ ઘટના અંગેની જાણ થતાં કાપોદ્રા PI સહિત પોલીસની ટુકડી ઘટનાસ્થળે દોડી આવી હતી અને વધુ તપાસ હાથ ધરી હતી.