રેશ્મા પટેલ જોડાયા AAPમાં- ભાજપના આ દિગ્ગજ પાટીદાર ચહેરા સામે લડી શકે છે ચુંટણી

ગુજરાત(Gujarat): રાજ્યની વિધાનસભાની ચૂંટણી(Gujarat Election 2022) જાહેર થયા બાદ એક બાદ એક મોટા સમાચારો સામે આવી રહ્યાં છે. NCPથી નારાજ રેશ્મા પટેલ હવે આમ આદમી પાર્ટીમા જોડાય ગયા છે. રેશ્મા પટેલ(Reshma Patel)એ આમ આદમી પાર્ટીના રાજ્યસભા સાંસદ તથા ગુજરાત પ્રદેશ સહ પ્રભારી રાઘવ ચઢ્ઢાના હાથે ખેસ ધારણ કરીને વિધિવત રીતે AAPમાં જોડાય ગયા છે. માત્ર એટલુ જ નહિ, આમ આદમી પાર્ટી રેશ્મા પટેલે વિરમગામ વિધાનસભા બેઠક પરથી ચૂંટણી લડાવી શકે છે. ત્યારે રેશ્મા પટેલ આંદોલનના જૂના સાથી એવા ભાજપના ઉમેદવાર હાર્દિક પટેલ(Hardik Patel) સામે વિરમગામ(Viramgam)મા મેદાને ઉતરશે તેવી માહિતી સુત્રો પાસેથી મળી રહી છે.

આમ આદમી પાર્ટીમાં જોડાવા પર રેશ્મા પટેલે મીડિયાને સંબોધતા જણાવ્યું હતું કે, આમ આદમી પાર્ટીના નામમાં જ એટલા ગુણો છે જે દર્શાવે છે કે તે સામાન્ય વ્યક્તિની પીડા સમજવાવાળી પાર્ટી છે. મેં હંમેશા ગુજરાતમાં ગરીબ લોકો માટે, પીડિત લોકો માટે, શોષિત લોકો માટે અવાજ ઉઠાવવા માટે મારી શક્તિ અર્પણ કરી છે અને હવે હું ઈચ્છું છું કે મારી શક્તિ અને સમય એવી પાર્ટી સાથે જોડાય જ્યાં ગુજરાતની જનતાનું ભવિષ્ય છે. ગુજરાતમાં એક સામાન્ય વ્યક્તિની એ જ માંગ છે કે બસ રોટી, કપડા અને મકાન મળી જાય. જેના માટે સારી શિક્ષણ વ્યવસ્થાની જરૂર છે અને મને સંપૂર્ણ વિશ્વાસ છે કે આમ આદમી પાર્ટી ગુજરાતની જનતાની આ તમામ જરૂરિયાતો ચોક્કસપણે પૂરી કરશે. અરવિંદ કેજરીવાલજી પોતે એક આંદોલનમાંથી આવેલા નેતા છે, એટલે કે તેઓ આંદોલનકારીની લાગણીઓને સમજી શકે છે અને તેથી જ આજે હું આમ આદમી પાર્ટીમાં જોડાઈ છું. મને ખાતરી છે કે અરવિંદ કેજરીવાલના નેતૃત્વમાં અને આમ આદમી પાર્ટીના કાર્યકર્તાઓના જુસ્સા સાથે હું મારી તાકાત વધારી શકીશ અને લોકો માટે કામ કરી શકીશ.

અત્રે ઉલ્લેખનીય છે કે, ગુજરાત ચૂંટણી પહેલા જ કોંગ્રેસ અને NCPએ ત્રણ બેઠકો પર ગઠબંધન કરી લીધું છે. જે બાદ NCP નેતા રેશ્મા પટેલ નારાજ હતા. આ સાથે સૌરાષ્ટ્રની કોઇપણ બેઠક પર NCPને મેન્ડેટ આપવામાં આવ્યું ન હતું. જેને કારણે રેશ્મા પટેલની ગોંડલ બેઠક પરથી ચૂંટણી લડવાની ઈચ્છા અધૂરી રહી ગઈ હતી. જોકે, ત્યારબાદ તેમણે એક નિવેદનમાં કહ્યુ હતું કે, તેઓ ગોંડલ બેઠક પરથી ચૂંટણી નહિ લડે, પરંતું ગોંડલના રાજકારણમાં સક્રિય રહેશે. ત્યારે નારાજ રેશ્મા પટેલે હવે આમ આદમી પાર્ટીનું ઝાડું પકડ્યું છે.