GIDC પર ત્રાટક્યા તસ્કરો: એકસાથે આટલી દુકાનો તૂટ્યા તાળા અને…

હાલમાં જીઆઇડીસી સામે આવેલ એક કારખાનામાં રાત્રીના સમયે કોઈક અજાણ્યા શખ્સે ઓફિસની બારીની લોખંડ ની ગ્રીલ તોડી પ્રવેશ કરી ટેબલના ડ્રોવરમાં રહેલ રોકડા 85,000 લઈને ભાગી જવાની ઘટના બની હતી. આ સાથે તસ્કરો એ અન્ય સાત જેટલી જગ્યા પર ચોરીનો પ્રયાસ કર્યો હતો.

મળતી માહિતી મુજબ અશ્વિનભાઈ બાબુભાઇ પંચાલ જીઆઇડીસીમાં ઓનેસ્ટ એન્જીનિયરિંગ વર્ક્સ નામનું કારખાનું ચલાવે છે અને પેપર મશીનરી પ્રોડક્ટ્સ બનાવે છે. તેઓ શુક્રવારે સાંજે 6 વાગ્યા આજુબાજુ પોતાનું કારખાનું બંધ કરી ઘરે ગયા હતા. શનિવારે સવારે તેમનો મેનેજર મોતીભાઈ મોર્યા કારખાને આવ્યો ત્યારે ઓફીસનો સામાન વેરવિખેર પડેલ જોતા એણે અશ્વિનભાઈને જાણ કરી હતી. તેઓ કારખાના ખાતે દોડી જઇ તપાસ કરતા કોઈક અજાણ્યા શખ્સો કંપનીની ઓફિસની પાછળ આવેલ બારીની લોખંડની ગ્રીલ તોડી ઓફિસમાં પ્રવેશ કર્યો હોવાનું જાણવા મળ્યું હતું.

આ ઈસમોએ ઓફિસમાં ટેબલના ડ્રોવરનો લોક તોડી તેમાં રહેલ વકરાના રોકડા 85,000ની રકમ તફડાવી લીધા બાદ ભાગી ગયા હોવાનું બહાર આવ્યું હતું. આ અંગે બારડોલી પોલીસ મથકે જાણ કરવામાં આવતા પોલીસ સ્થળ પર પહોંચી ઈસમોને પકડવાના પ્રયાસ શરૂ કર્યા હતા. આ ઘટના અંગે બારડોલી પોલીસ મથકે 85,000ની ચોરી અંગે અજાણ્યા ઈસમ સામે ગુનો દાખલ કરવામાં આવ્યો છે.

જીઆઇડીસીમાં કારખાનાંમાંથી રોકડા 85000 ચોરાયા હતા. સાથોસાથ અન્ય સાત ઠેકાણે પણ તાળા તોડી ચોરીનો પ્રયાસ કરવામાં આવ્યો હતો. તેમાં યામાહા કંપનીના શો-રૂમનું, સુમિત શાહના આરઓ સિસ્ટમની ઓફિસનું, કેયુર પટેલના ન્યુ યુવા વોટરની ઓફિસનું તાળું તોડવામાં આવ્યું હતું. આ ઉપરાંત બાગાયત મંડળીની ઓફિસનું તાળું અને ફિલ્ટર પ્લાન્ટના દરવાજાનું તાળું તોડવામાં આવ્યું હતું. જ્યારે એક શોરૂમની પાછળ આવેલ લોખંડની ગ્રીલ પણ ચોરટાઓ દ્વારા તોડવામાં આવી હતી. જોકે જાણવા મળું છે કે, આ તમામ સ્થળોએથી ખાસ કોઈ મત્તાની ચોરી થઈ ન હતી.