સુરતના ઠક્કર પરિવારમાં માતમ વચ્ચે ખુશીનો માહોલ- બ્રેઈનડેડ ઉષાબેન પાંચ લોકોમાં કાયમ માટે રહેશે જીવંત ‘ઓમ શાંતિ’

ટેક્ષટાઇલ (textile) અને ડાયમંડ (Diamond) સીટી તરીકે ઓળખાતું સુરત (Surat) શહેર હવે દેશમાં ઓર્ગન ડોનર સીટી તરીકે ખ્યાતી પામી રહ્યું છે. ઠક્કર પરિવારના 53 વર્ષીય ઉષાબેન રમેશભાઈ ઠક્કરનું બ્રેઈનડેડથી થયું હતું અને ત્યારે તેમના પરિવારે ડોનેટ લાઈફ (Donate Life) ના માધ્યમથી ઉષાબેનના કિડની, લિવર અને ચક્ષુઓનું દાન કરી અન્ય પાંચ વ્યક્તિઓને નવજીવન આપ્યું છે. ઉષાબેનના પરિવારે માનવતાની મહેક ફેલાવી સમાજને નવી દિશા બતાવી છે.

ડિસા તાલુકાના બનાસકાંઠા જીલ્લામાં રહેતા ઉષાબેન સુરતમાં ચાર્ટડ એકાઉન્ટન્ટની પ્રેક્ટીસ કરતા પુત્ર મુકેશના ઘરે એક મહિનાથી રહેતા હતા. 11 જાન્યુઆરીએ લગભગ 4 વાગે ઉષાબેનને ખેંચ આવી અને વોમીટ થવા લાગી હતી. પરિવારજનોએ તેમને તાત્કાલીક BAPS પ્રમુખ સ્વામી હોસ્પીટલમાં સારવાર માટે લઇ ગયા હતા.

હોસ્પીટલમાં ડૉ. હસમુખ સોજીત્રાની સારવાર હેઠળ દાખલ કરવામાં આવ્યા હતા. CT સ્કેન કરાવતા મગજની લોહીની નસ ફાટી ગઈ હોવાનું સામે આવ્યું હતું. ત્યાર બાદ સર્જરી કરી મગજની ફાટી ગયેલી નસનું ક્લીપીંગ કર્યું હતું. ત્યાર બાદ 16 જાન્યુઆરીએ ઉષાબેનને બ્રેઈનડેડ જાહેર કર્યા હતા.